ԵՐԵՎԱՆ, 27 սեպտեմբերի — Sputnik. ՀՀ արտգործնախարար Էդվարդ Նալբանդյանը հայտարարել է, որ Ադրբեջանին որոշ տարածքներ հանձնելու վերաբերյալ իր խոսքերը կոնտեքստից կտրված էին։ Այս մասին նա ասել է Եվրոպայի և Ամերիկայի հարցերով Մեծ Բրիտանիայի պետական նախարար Ալան Դունկանի հետ Երևանում տեղի ունեցած համատեղ մամուլի ասուլիսի ժամանակ։
ՀՀ արտգործնախարարը սեպտեմբերի 18-ին «Հայաստան–Սփյուռք» համաժողովին ելույթ ունենալիս ասել է, որ Արցախի անվտանգության չսպառնացող տարածքները կարող են հանձնվել Ադրբեջանին։
«Որոշ հայտարարություններ համատեքստից դուրս էին հանվել։ Ես կոնկրետ տարածքների մասին չեմ խոսել, այլ խոսել եմ այն սկզբունքների մասին, որոնք դրված են ԵԱՀԿ ՄԽ համանախագահների հինգ հայտարարությունների մեջ, որոնք նրանց ձևակերպման համաձայն, մեկ ամբողջականություն են կազմում», – ասել է Նալբանդյանը։
Նրա խոսքով` այդ սկզբունքների մասնատումը կարգավորումն անհնարին կդարձնի։ Հենց դրանով էլ զբաղվում է Ադրբեջանը։
Նալբանդյանն ուշադրություն է հրավիրել այն հանգամանքին, որ ինչպես ավելի վաղ նշել էր ՀՀ նախագահը, ամենակարևորն Արցախի կարգավիճակն ու նրա անվտանգությունն է։ Եթե այդ հարցերը լուծում ստանան, մյուսները երկրորդական կլինեն։
