Խոշոր կաթնասունները, հիմնականում` արջերը վերադառնում են Խոսրովի անտառ։ Լրագրողներին հայտնել է բնապահպանության նախարարը։
«Լուսապատկերներով տեսնում ենք, որ կա այդ կենդանիների հետ վերադարձը դեպի իրենց նախկին բնակատեղի»,– ասաց Մինասյանը` հավելելով, որ կատարված բոլոր ուսումնասիրությունները վկայում են, որ խոշոր կաթնասունները Խոսրովի անտառի հրդեհից չեն տուժել։
Միջատներից հիմնականում տուժել են մորեխները, որոշ չափով`սողուններն ու կրծողները։ Հրդեհը հիմնական վնաս պատճառել է բուսական աշխարհին, մասնավորապես` գիհի ծառատեսակին։
Հրդեհված շուրջ 2200 հա տարածքի կեսը`1100 հա–ը, խոտածածկ տարածքն է, որն, Արծվիկ Մինասյանի խոսքով, անձրևային եղանակին կվերականգնվի։ 900 հա–ը կաղնունտներն են, որոնց ևս մեծ վնաս չի պատճառվել և առաջիկա գարնանը հնարավոր է բնական ինքնավերականգնում տեղի ունենա։ 220 հա–ը գիհուտներն են, որոնք գրեթե վերականգնման ենթակա չեն։
