ԵՐԵՎԱՆ, 26 սեպտեմբերի — Sputnik. Խոսրովի անտառում 24 օր տևած հրդեհաշիջման աշխատանքների ընթացքում դրանց մասնակիցները նկատել են, որ մարած հրդեհի տեղում որոշ ժամանակ անց դարձյալ հրդեհ էր բռնկվում։ Կատարված ուսումնասիրությունների արդյունքում բնապահպաններն ու երկրաբանները հայտնաբերել են բնական ապարների մի տեսակ, որը, որոշ մասնագետների կարծիքով, կարող էր նոր բռնկումների պատճառ դառնալ։ Այս մասին այսօր լրագրողներին տեղեկացրեց ՀՀ բնապահպանության նախարար Արծվիկ Մինասյանը։
«Կայծքարերի նման ինչ-որ նյութեր կային, որոնք կլանում էին ջերմությունն ու կեսօրից հետո կարող էին պայթել ու բոց առաջացնել։ Սա նաև պատճառ դարձավ, որ հրդեհաշիջման աշխատանքները տևեցին 24 օր»,– ասաց Մինասյանը։
«Խոսրովի անտառ» արգելոցում ամռանը բռնկված հրդեհի իրական պատճառը դեռ բացահայտված չէ, հարուցված քրեական գործով նախաքննությունը շարունակվում է։
Մինչ քննիչները փնտրում են հրդեհի բռնկման հնարավոր պատճառները, Բնապահպանության նախարարությունը նախաքննական մարմնին է ներկայացրել նաև ստացված արբանյակային լուսանկարները։
Հրդեհի առաջին օրը առավոտյան կատարված լուսանկարներում երևում է, որ հրդեհը բռնկվել է արգելոցի միաժամանակ 3 տարբեր տեղամասերում։
Հիշեցնենք, որ «Խոսրովի անտառ» արգելոցի հրդեհը բռնկվել է օգոստոսի 12–ին։ Տևական ժամանակ ԱԻՆ, ԶՈՒ, բնապահպանության աշխատակիցներին ու շարքային քաղաքացիներին չէր հաջողվում հրդեհը մարել։
