ԵՐԵՎԱՆ, 26 սեպտեմբերի — Sputnik. Սևանա լճի մակարդակի նվազումը հետևանք է ոչ միայն լճից բաց թողնվող ջրի ծավալի ավելացման, այլև աննախադեպ շոգի ու գոլորշիացման։ Այսօր լրագրողների հետ հանդիպմանն ասաց ՀՀ բնապահպանության նախարար Արծվիկ Մինասյանը` հաստատելով, որ այս տարի անցյալ տարվա նույն ժամանակահատվածի համեմատ լճի մակարդակը նվազել է 3 սմ-ով։
«Այո, այս պահի դրությամբ մենք ունենք 3 սմ-անոց անկում, բայց ակնկալում ենք, որ տեղումների միջոցով հնարավոր է որոշակի իրավիճակի շտկում»,- ասաց նախարարը` հավելելով, որ իրական իրավիճակի գնահատականը կտրվի տարեկան արդյունքների ամփոփումից հետո։
Այդուհանդերձ, Արծվիկ Մինասյանը համոզված է` լճից ջրի նախատեսվածից ավելի ծավալի բացթողում չի իրականացվել։
«Ավելի մեծ ծավալ վերցնելու որևէ հիմք, նպատակ կամ փաստացի իրավիճակ չկա, և, որպես ոլորտի պատասխանատու, մենք բացառելու ենք»,- հավաստիացրեց բնապահպանության նախարարը։
Հիշեցնենք՝ կառավարության առաջարկով այս և առաջիկա տարիների համար Սևանա լճից տարեկան ջրառը նախկին 170 միլիոն խմ-ի փոխարեն, ԱԺ-ի համաձայնությամբ, սահմանվել է 270 միլիոն խմ։
Սեպտեմբերի 15-ին ժամը 19:00-ի դրությամբ Սևանա լճից ջրի բացթողումը դադարեցվել է։ Այս մասին հայտնել էր բնապահպանության նախարարի մամուլի խոսնակ Մարինե Կարապետյանը։
Դադարեցման պատճառն, ըստ նրա, այն է, որ սեպտեմբերի 15-ին լրացել է Սևանա լճից ջրի բացթողման` ՀՀ օրենքով նախատեսված ծավալը։
Բնապահպանության և արտակարգ իրավիճակների նախարարությունների, «Ջրառ» ՓԲԸ-ի և «ՄԷԿ» ՓԲԸ-ի ներկայացուցիչների կողմից սահմանված կարգով կապարակնքվել են «Սևան» ՀԷԿ-ի ջրընդունիչի վահանակները։
