ԵՐԵՎԱՆ, 26 սեպտեմբերի- Sputnik, Գոհար Սարգսյան. Լուսիա Խիմենես Պեռնասի անհավանական պատմության շարունակությամբ խիստ հետաքրքրված էին Sputnik Արմենիայի ընթերցողները: Պարբերաբար ստացված նամակներում գերակշռող էր հարցադրումը՝ ի վերջո Լուսիան հանդիպեց հայազգի հորը, թե ոչ:
Լուսիայի երազանքը կատարվեց. նա հանդիպեց հորն ու եղբայրներին: Մեզ հետ բացառիկ զրույցում Լուսիան պատմեց՝ հայրն ու երկու եղբայրը եկան նրա հետևից ու տարան տուն:
«Ես ինձ շատ երջանիկ էի զգում այդ պահին, շատ հուզված էի, ուրիշ ոչինչ չեմ կարող ասել: Իմ բոլոր պատկերացումներից շատ ավելի լավ ստացվեց հանդիպումը։ Շատ տպավորված եմ, չեմ կարող փոխանցել բառերով»,-պատմեց Լուսիան:
Աղջիկը խոստովանեց՝ դեռ չգիտի, թե հոր հետ հարաբերություններն ինչպես կզարգանան, հիմա աշխատում է այդ մասին շատ չխոսել ու պահի երջանկությունը վայելել: Ինչ-որ տեղ նա անընդհատ վախենում է՝ եթե այդ թեմայով շատ խոսի, գուցե մի բան անհաջողության մատնվի:
Դրա համար էլ խոսակցության թեման չհապաղեց շեղել դեպի հայաստանյան տպավորությունները:
«Հրաշք երկիր է, իմ սպասելիքներից ավելին տեսա: Ասեմ, որ այն ինչ տեսել էի լուսանկարներով, իրականության հետ մի փոքր անհամապատասխան էր: Հայաստանը շատ ավելի գեղեցիկ է: Այստեղ մարդիկ շատ բարեհամբույր են, հարազատի նման են վերաբերվում քեզ: Իսկ խոհանոցից ուղղակի հիացած եմ, շատ համեղ է: Մեկ էլ ինձ շատ զարմացրեց ապահովությունը: Ցանկացած ժամի կարող ես դուրս գալ, ոչ մի բան չի լինի: Աշխարհում այսպիսի ապահով քաղաքներ շատ քիչ են մնացել»,-ասաց Լուսիան:
Հասնելով Կուբա` Լուսիան իր ֆեյսբուքյան էջում գրել է. «Կրկին Կուբայում եմ: Հիմա ամեն ինչ այլ է, միայն իմ մի կեսն է ինձ ուղեկցում, իսկ մյուս կեսս ընդմիշտ մնաց Հայաստանում…» (ի դեպ, աղջիկը լատինական տառերով հենց Հայաստան է գրել)։
Հայկական արմատները բացահայտած կուբացի կինը մի առիթ էլ ունի Հայաստան վերադառնալու համար, նա վերջնականապես որոշել է՝ մկրտվելու է հոր երկրում: Միայն թե մինչ այդ կարևոր քայլին դիմելը Լուսիա Խիմենես Պեռնասը մի լավ կուսումնասիրի հայոց պատմությունը, մշակույթն ու ավանդույթները:
