ԵՐԵՎԱՆ, 26 սեպտեմբերի — Sputnik. Հայաստանն ակտիվորեն կներգրավվի բժշկական զբոսաշրջության զարգացման մեջ։ Մոտ ապագայում առաջնահերթ ուղղություններից կլինեն ուռուցքաբանության և սրտաբանության ոլորտները։ Լրագրողների հետ զրույցում այս մասին ասաց ՀՀ առողջապահության նախարար Լևոն Ալթունյանը։
«Բժշկական տուրիզմի զարգացման մասին քննարկումները չեն տանում նրան, որ միայն բուկլետներ տպենք և հրավիրենք գործընկերներին մեզ մոտ բուժման: Իմաստն այն է, որ լինեն որոշ ուղղություններ, որոնց զարգացումը կհամարվի ստրատեգիական», — ասաց Ալթունյանը։
Նրա խոսքով` այդ ուղղություններից են ուռուցքաբանությունը, սրտաբանությունը, որոնք Հայաստանի առողջապահության ռազմավարական վեկտոր կդառնան մոտ ապագայում։ Նա ընդգծեց, որ այսօր զբոսաշրջիկներն ավելի շատ հետաքրքրված են դիմածնոտային վիրաբուժությամբ, ատամնաբուժությամբ ու պլաստիկ վիրաբուժությամբ։
Փորձագետների գնահատականների համաձայն` Հայաստանում բժշկական զբոսաշրջության զարգացման մեծ ներուժ կա, որը պայմանավորված է երկու գործոնով` լավ կլինիկաների առկայություն և մատչելի գներ, մասնավորապես` պլաստիկ վիրաբուժության և ատամնաբուժության բնագավառում։
