ՀՀ կառավարությունը որոշել է վերանայել վարկային քաղաքականությունն ու հրաժարվել որոշ վարկերից։ Այս տեղեկությունն այսօր լրագրողների հետ հանդիպմանը հաստատեց ֆինանսների նախարար Վարդան Արամյանը` նշելով, որ նպատակը ՀՀ արտաքին պարտքի կայունացումն է։
Արամյանը նշեց, որ վարկային բազմաթիվ ծրագրեր այս պահին բանակցային փուլում են։ Խոսքը 7 մլրդ դոլարի չափով վարկային միջոցների մասին է, որոնք առաջիկա 7-8 տարվա ընթացքում ՀՀ կառավարությունը պատրաստվում է ներգրավել տնտեսության մեջ։
«Կառավարությունն առայժմ չի հստակեցրել, թե որ վարկային ծրագրերից է մտադիր հրաժարվել»,- ասաց Վարդան Արամյանը, բայց նշեց մի քանի հնարավոր տարբերակներ։
Դրանցից են KFW բանկի էլեկտրաէներգետիկ ցանցերի վերազինման ուղղված ծրագիրը, որը ֆինանսների նախարարի խոսքով, հնարավոր է իրականացվի ԲԷՑ-ի սեփական միջոցների հաշվին։
«Կամ եթե Հյուսիս-Հարավ ճանապարհի հարավային մասում որևէ մասնավոր ընկերություն համաձայնի ներդրում անել, պետության մասնակցության կարիք այլևս չի լինի»,- ասաց Արամյանը։
Ֆինանսների նախարարը նաև նշեց, որ կառավարության վերանայման ենթական բոլոր վարկային ծրագրերն ուղղված են լինելու ենթակառուցվածքների արդիականացմանը։
