ԵՐԵՎԱՆ, 25 սեպտեմբերի — Sputnik. Մինչև 2020թ-ը ՀՀ կառավարությունը կրկնակի հարկումը բացառող առևտրային նոր համաձայնագրեր կստորագրի 8 երկրի հետ։ Այս մասին այսօր լրագրողներին հայտնեց ՀՀ ֆինանսների նախարար Վարդան Արամյանը։
Այդ երկրների շարքում կլինի ԱՄՆ-ն, թե ոչ, դեռ պարզ չէ։ Վարդան Արամյանը չթաքցրեց, որ ամերիկյան կողմին համոզելու և համոզիչ փաստարկներ ներկայացնելու ուղղությամբ անելիքներ դեռ շատ ունեն։
Բայց որ համաձայնագիրն անհրաժեշտ է, ֆինանսների նախարարը վստահ է, հատկապես որ խորհրդային տարիներին ստորագրված նույնաբովանդակ համաձայնագիրը, նրա խոսքով, այլևս իրավաչափ չէ։
«ՀՀ-ն չի հանդիսանում ԽՍՀՄ իրավահաջորդ, և այն իրավունքներն ու պարտավորությունները, որոնք նախատեսված էին ԽՍՀՄ-ի համար, չեն կարող փոխանցվել ՀՀ-ին։ Համաձայնագիրը կնքվել է 1970-ական թվականներին, հետևաբար մինչ օրս միջազգային հարկման սկզբունքներում էական փոփոխություններ են կատարվել։ Ուստի նոր համաձայնագիրը թույլ կտա Հայաստանին հետ չմնալ նոր սկզբունքներից»,- ասաց նախարարը։
Համաձայնագրի անհրաժեշտությունն ապացուցելու համար ֆինանսների նախարարը հիշեցրեց, որ, օրինակ, ամերիկյան «Կոնտուր գլոբալ» ընկերությունը հայաստանյան շուկա մուտք գործեց իր լյուքսեմբուրգյան դուստր ձեռնարկության միջոցով, քանի որ այդ երկրի հետ Հայաստանն ուներ կրկնակի հարկումը բացառող համաձայնագիր, իսկ ԱՄՆ-ի հետ` ոչ։
Հիշեցնենք` Հայաստանում ԱՄՆ դեսպան Ռիչարդ Միլսն օրեր առաջ ասել էր, որ Ամերիկայի Միացյալ Նահանգները չի պատրաստվում չեղարկել Հայաստանի հետ կրկնակի հարկում նախատեսող համաձայնագիրը, որը ստորագրվել է 1976 թ.-ին։ Ամերիկացի դիվանագետը հայտարարել էր, որ այն լիովին բավարարում է երկու երկրի առևտրային հարաբերությունների իրականացմանը, և ՀՀ կառավարությունից նոր համաձայնագրի անհրաժեշտությունը հիմնավորող փաստարկներ էր պահանջել։
