ԵՐԵՎԱՆ, 25 սեպտեմբերի — Sputnik. Կոտայքի մարզի Աբովյան քաղաքի Սարալանջ թաղամասում գտնվող «Սիփան» պահածոների և ոչ ոգելից ըմպելիքների գործարանում այսօր առավոտյան տեղի է ունեցել պայթյուն։
ԱԻՆ–ը հայտնում է, որ պայթյունի, վիրավորների ու փլուզման վտանգի մասին ահազանգը ստացվել է ժամը 11:00-ին։ Դեպքի վայր են մեկնել մեկ մարտական հաշվարկ, Հատուկ նշանակության փրկարարական աշխատանքներ իրականացնող կենտրոնի փրկարարական ջոկատը և մարզային փրկարարական վարչության օպերատիվ խումբը:
Ավելի ուշ պարզվել է, որ գործարանի կաթսայատանը տեղի ունեցած պայթյունի հետևանքով փլուզվել է կաթսայատան պատը։ Գործարանի հարակից փողոցով անցնող 61–ամյա պատահական անցորդն ու գործարանի 32-ամյա աշխատակիցը տարբել աստիճանի մարմնական վնասվածքներով տեղափոխվել են հիվանդանոց։
Փրկարարներն ապամոնտաժել են պատի թուլացած հատվածն ու վնասազերծել տարածքը։
