ԵՐԵՎԱՆ, 25 սեպտեմբերի — Sputnik. «Միսս Հայաստան 2017» տիտղոսակիրը` 17 տարեկան Լիլի Սարգսյանը, հաղթանակից հետո երկար չի հանգստանալու. նա պետք է երկիրը ներկայացնի «Միսս աշխարհ 2017» մրցույթում Չինաստանում։
«Ես 17 տարեկան եմ, ու սա իմ առաջին փորձն է։ Ես չէի սպասում, որ գեղեցկության թագուհու տիտղոսակիրը կդառնամ։ Այս պահից կսկսեմ պատրաստվել, որպեսզի մեր երկիրն արժանապատվորեն ներկայացնեմ Չինաստանում», — լրագրողների հետ զրույցում ասաց Լիլին։
Աղջկա խոսքով` առաջին անգամ է մեծ բեմում։ Լիլին քոլեջում է սովորում ու, չնայած մոդելային բիզնեսում ունեցած հաջողությանն ու երազանքի իրականացմանը, չի պատրաստվում թողնել ուսումը։ Նա որպես պարգև ստացավ արծաթե թագը` թանկարժեք քարերով` 2 միլիոն դրամ (մոտ 4300 դոլար) ընդհանուր արժողությամբ։
«Ծնողներս ցանկացած հարցում միշտ աջակցել են ինձ, երևի դա էլ օգնեց ինձ», — ասաց Լիլին։
«Միսս Հայաստան 20017» մրցույթի կազմակերպիչ Գոհար Հարությունյանը համարում է, որ Լիլին արժանի էր իր տիտղոսին։
«Լիլին ինտրովերտ է ու մելանխոլիկ։ Սակայն այս պահից մենք կաշխատենք, որ բացահայտենք նրա բնավորությունը, բեմական քայլը հղկենք ու թաքցնենք ամաչկոտությունը», — ասաց Հարությունյանը լրագրողների հետ զրույցում։
Նա համոզված է, որ աղջիկը, չնայած երիտասարդ տարիքին, Հայաստանն ըստ արժանվույն կներկայացնի «Միսս աշխարհ» մրցույթում։
Սեպտեմբերի 24-ին Երևանում անցկացվեց վերջին տարիների ընթացքում առաջին գեղեցկության մրցույթը։
«Միսս Հայաստան 2017» տիտղոսը ստացավ Լիլի Սարգսյանը (Երևան)։ Առաջին վիցե-միսս ճանաչվեց Անահիտ Իսախանովան, երրորդ հորիզոնականում հայտնվեց Թերեզա Մարտիրոսյանը, չորրորդում` Արմինե Մանուկյանը։
«Միսս Տաղանդ» անվանակարգում հաղթող ճանաչվեց Թերեզա Մարտիրոսյանը (Սյունիք), Սփյուռքի թագուհի դարձավ Սինտիա Թաբուջյանը (Լիբանան), «Հանդիսատեսի համակրանքի» մրցանակը հասավ գյումրեցի Էդուարդա Բաղդասարյանին։
Կազմակերպիչները մտադիր են «Միսս Հայաստան» մրցույթն ավանդական դարձնել, հաղթողներին հնարավորություն տալ հետագայում մասնակցել այնպիսի հեղինակավոր մրցույթների, ինչպիսիք են «Միսս աշխարհը», «Միսս տիեզերքը»։
Աղջիկները մրցույթից առաջ Հայաստանի տեսարժան վայրերին ծանոթանալու, նկարահանումների մասնակցելու, տեղացիների հետ շփվել հնարավորություն են ունեցել։
«Միսս Հայաստան» առաջին մրցույթն անցկացվել է 1996 թվականին, իսկ վերջինը՝ 2012-ին։ Մրցույթների հաղթողներն էին, համապատասխանաբար, Կարինե Խաչատրյանն ու Աննա Առաքելյանը։ Հինգ տարի շարունակ մրցույթը չի անցկացվել միջոցների սղության պատճառով։
