ԵՐԵՎԱՆ, 24 սեպտեմբերի — Sputnik, Լաուրա Սարգսյան․ Թումանյանի հեքիաթների հերոսները մարմնավորվել են հեղինակի սիրելի գյուղ Դսեղում։ Գյուղի կենտրոնական ծառուղին ու տուն-թանգարանը վերածվել են անվանի հայ գրող Հովհաննես Թումանյանի հեքիաթների ուղեցույցի։
«Ծառուղու ու այգու փայտե արձանները պատրաստված են՝ հիմնվելով Թումանյանի հեքիաթների կերպարների վրա։ Դրանք պետական գեղարվեստի ակադեմիայի ուսանողների ու դասախոսների աշխատանքներն են»,- Sputnik Արմենիայի հետ զրույցում ասաց Թումանյանի տուն-թանգարանի վարիչ Ռոզա Խազումյանը։
Նա համոզված է, որ վերականգման աշխատանքներից ու նորարարություններից հետո թանգարանում զբոսաշրջիկների տեղատարափ է լինելու։ Դրա հետ համաձայն են նաև տեղացիները։ Թանգարանում լուծվել է, թեևս, ամենակարևոր խնդիրը. զուգարան է հայտնվել։ Շուտով այստեղ նախատեսվում է այցելուների համար փոքրիկ սրճարան բացել, երեխաների համար էլ ժամանցի անկյուն կլինի։
«Հուսով եմ՝ իշխանությունները կզբաղվեն դեպի գյուղ տանող ճանապարհի վերակառուցմամբ, ինքներդ էլ գիտեք՝ ինչ անմխիթար վիճակում է։ Լավ ճանապարհը մեզ մոտ ավելի շատ զբոսաշրջիկ կբերի», — ասաց Խազումյանը։
Վերականգման աշխատանքները նվիրված են Հովհաննես Թումանյանի 150-ամյակին։ Նախագծի նախաձեռնողը Հայաստանի մշակույթի նախարար Արմեն Ամիրյանն էր, սակայն ներդրումներն արել է ամերիկահայ գործարար Աշոտ Տիգրանյանը։
Միջոցառման շրջանակում տուն-թանգարանի բակում կտրված ծառերի փոխարերն տնկիներ են դրվել։ Մշակութային մասն ապահովել են գյուղի մշակույթի տան համույթները։
