ԵՐԵՎԱՆ, 23 սեպտեմբերի — Sputnik. Հայ գրոսմայստեր Լևոն Արոնյանը ոչ-ոքի ավարտեց առաջին պարտիան չինացի Լիրեն Դինգի հետ Շախմատի աշխարհի գավաթի խաղարկության եզրափակիչում: Ինչպես և սպասվում էր, եզրափակիչում կողմերը ավելի զգույշ են գործում, և 37 քայլ կատարելուց հետո Արոնյանը, որը սպիտակ խաղաքարերով էր խաղում, կիսեց միավորը առաջին պարտիայում:
Երկու շախմատիստներն էլ դժվարին ճանապարհ են անցել եզրափակիչում խաղալու համար:
Արոնյանի համար առավել դժվար ստացվեց կիսաեզրափակիչը: Երկու շախմատիստն էլ մեկօրյա հանգստից հետո նորից նստեցին սեղանի շուրջ, որոշելու աշխարհի գավաթակրին:
Այս փուլում արդեն առավելություն է տրվում դասական շախմատին, որի կանոններով կողմերը չորս պարտիա կանցկացնեն, նախորդ փուլերի երկուսի փոխարեն: Եթե գրանցվի ոչ-ոքի, ապա արդեն արագ, հետո կայծակնային շախմատի պարտիաներ կանցկացվեն, ու եթե այսքանից հետո նորից հավասարություն լինի, ապա Արոնյանը ստիպված կլինի երկրորդ անգամ անցկացնելու «մահվան» պարտիան: Երկրորդ պարտիան կայանալու է վաղը` սեպտեմբերի 24-ին։
