ԵՐԵՎԱՆ, 22 սեպտեմբերի — Sputnik. Նարեկ Հախնազարյանին Հայաստանի Վաստակավոր արտիստի կոչումը ոգևորել է: Ոգևորիչ է, երբ գնահատում է ոչ միայն ժողովուրդը, այլ նաև երկրի իշխանությունը: Այս կոչումն աշխարհահռչակ թավջութակահարն ընդունել է երախտագիտությամբ, բայց որպես ավանս, որպեսզի ավելի զարգանա ու աշխարհի լավագույն բեմերից շարունակի ներկայացնել Հայաստանը:
«Կոչում ունենալ-չունենալն, իրականում, չպետք է ազդի աշխատանքիդ որակի վրա: Դասական երաժշտության ոլորտում, օրինակ, շատերը չունեն այդպիսի կոչումներ, բայց ունեն շատ արժանիքներ: Կյանքն արդար բան չէ»,- անկեղծանում է Նարեկը:
Միջազգային մրցույթներում Նարեկը միշտ ներկայացնում է Հայաստանը: Բայց Հայաստանում ընդունված այսպիսի կոչումներ շնորհելու տրամաբանությունը հաճախ նրան անհասկանալի է: Օրինակ` հենց իր ծնողներին է նշում: Գայանե և Սուրեն Հախնազարյանները պրոֆեսորներ են, արդեն 40 տարի աշխատում են Երևանի Կոմիտասի անվան կոնսերվատորիայում: Սուրեն Հախնազարյանը 26 տարի նվագել է Կոմիտասի անվան լարային քառյակում:
«Նա աշխարհի 40 –ից ավելի երկրներում է եղել քառյակի կազմում: Այսինքն`այդքան երկրում ներկայացրել է հայ մշակույթն ու Կոմիտասին: Նա վաստակավորի կոչում չունի, մինչդեռ Ժողովրդականի է արժանի»,-ասում է թավջութակահարը:
Իր կոչումը Նարեկ Հախնազարյանը ծնողներինն է համարում: Շատ են հպարտանում որդու հաջողություններով: Նարեկ Հախնազարյանի հաջողությունները շատերին են ոգևորել՝ թավջութակի նկատմամբ հետաքրքրության ալիք է սկսվել: Նարեկ Հախնազարյանն այդպիսի օրինակ շատ է տեսնում վերջին տարիներին:
