ԵՐԵՎԱՆ, 21 սեպտեմբերի — Sputnik. ՀՀ անկախության 26-րդ տարեդարձի առթիվ գիտության, կրթության, առողջապահության, տնտեսության, արվեստի, մշակույթի և սպորտի ոլորտներում ունեցած վաստակի, արդյունավետ աշխատանքի, հայրենիք-սփյուռք կապերի խորացման և ընդլայնման գործում ունեցած նշանակալի ավանդի համար մի խումբ գործիչներ, զինված ուժերի և իրավապահ մարմինների ներկայացուցիչներ պարգևատրվել են Հայաստանի Հանրապետության բարձրագույն պարգևներով՝ շքանշաններով և մեդալներով, շնորհվել են նաև պատվավոր կոչումներ:
Նախագահ Սարգսյանը հայտնեց՝ ուրախ է, որ մեծարում ենք նրանց, ովքեր ոչ միայն անցնող տարում, այլև իրենց ողջ կյանքում աշխատել են նվիրումով, ծառայել են երկրին ու հանրությանը և արձանագրել լուրջ հաջողություններ իրենց ասպարեզներում:
«Այն, ինչին դուք այսօր արժանանում եք՝ մեդալների, շքանշանների և կոչումների տեսքով, իշխանությունների բարեհաճություն կամ նվեր չէ: Դրանք մեր ողջ ժողովրդի և երկրի գնահատականն են ձեր կարևոր և շնորհակալ գործունեությանը: Այսօր և վաղը կյանք մտնող երիտասարդները պետք է ունենան չափանիշներ և ուղենիշներ: Նրանք պետք է իմանան, թե ի՛նչն է մեզ համար արժեք»,-ասաց նախագահ Սարգսյանը:
Նախագահը համոզմունք հայտնեց, որ վաղը նման արժանավորները մեր երկրում ավելի շատ են լինելու, և մեր անկախության հաջորդ տարեդարձները մենք տոնելու ենք ավելի ամրացած և ուժեղացած:
Տեղեկացնենք, որ ՀՀ նախագահի մրցանակին արժանացան նաև Խոսրովի անտառում բռնկված հրդեհի մարման աշխատանքներին մասնակցած ռուս զինվորականներ: Նրանք հայտնեցին, որ անչափ ուրախ են Հայաստանի նախագահի մրցանակին արժանանալու համար և խոստովանեցին, որ իրենց գործունեության մեջ սա ամենաբարդ մարվող հրդեհն էր:
