ԵՐԵՎԱՆ, 21 սեպտեմբերի — Sputnik. Աշնան վերջին ամիսը Երևանում կնշանավորվի գեղեցիկ միջոցառմամբ։ Նոյեմբերին Կարեն Դեմիրճյանի անվան մարզահամերգային համալիրում կկայանա «Թոփ մոդել ԱՊՀ» գեղեցկության միջազգային մրցույթը։
Մրցանակաբաշխությանը կմասնակցեն ԱՊՀ անդամ երկրների 18-27 տարեկան 30-35 գեղեցկուհիներ, որոնք իրենց երկրներում կայանալիք ընտրական մրցույթներում կճանաչվեն հաղթող: Հաղթանակած մոդելները հոկտեմբերի վերջին կժամանեն Հայաստան՝ մրցույթի եզրափակիչ փուլին մասնակցելու համար:
«Թոփ մոդել ԱՊՀ» գեղեցկության միջազգային մրցույթին ներկա կլինեն ԱՊՀ երկրների բազմաթիվ մասնագետներ մոդելային աշխարհից և շոու բիզնեսից:
Այն հարթակ է սկսնակ և կայացած մոդելների համար ոլորտի առաջատար դեմքերի հետ գործնական կապեր ձեռք բերելու և միջազգային մոդելային շուկայում հանդես գալու առումով:
Մրցույթին մասնակցելու համար անհրաժեշտ է մասնակցության հայտ լրացնել՝ այցելելով «Թոփ մոդել ԱՊՀ» գեղեցկության միջազգային մրցույթի պաշտոնական կայքէջ (www.miss-sng.com):
