ԵՐԵՎԱՆ, 21 սեպտեմբերի — Sputnik. ՀՀ վարչապետ Կարեն Կարապետյանը շնորհավորել է մեր ամենակարևոր պետական տոնի՝ Հայաստանի Հանրապետության անկախության տարեդարձի առթիվ: Այս մասին հայտնում է ՀՀ կառավարության մամուլի ծառայությունը։
Նա նշել է, որ անկախության 26 տարիները մեր երկրի և ժողովրդի համար լի են եղել փորձություններով, սակայն մեզ հաջողվել է ամրապնդել նորանկախ պետության հիմքերն ու առաջ շարժվել երկրի զարգացման ճանապարհով։
«Զարգացման յուրաքանչյուր փուլ իր հետ բերում է նոր մարտահրավերներ, որոնց հաղթահարումն ավելի է ամրապնդում մեր պետությունը՝ այն դարձնելով ավելի գրավիչ ու մրցունակ։ Այս նոր փուլի հրամայականն է ժամանակակից և առաջադեմ երկիր ստեղծելը, Ազատ, Անվտանգ, Արդար ու Խելացի Հայաստան ունենալը»,- նշել է վարչապետը։
Կարապետյանը համոզված է, որ այս նպատակի իրագործման համար մենք ունենք բոլոր անհրաժեշտ նախադրյալներն ու ամենակարևորը՝ մեր ստեղծարար ժողովրդի ներուժը։
«Վստահ եմ, որ միասնաբար ի զորու ենք կառուցել մեր երազած հայրենիքը։ Եվ ուզում եմ, որ և՛ Հայաստանի քաղաքացիները, և՛ աշխարհի տարբեր երկրներում բնակվող մեր հայրենակիցները վստահ լինեն, որ դա մեզ հաջողվելու է»,- շեշտել է վարչապետը:
Նա ևս մեկ անգամ շնորհավորել է համախմբող մեծ ուժ ու խորհուրդ ունեցող տոնի կապակցությամբ, հայ ժողովրդին մաղթել խաղաղություն, բարօրություն և առաջընթաց։
