ԵՐԵՎԱՆ, 21 սեպտեմբերի — Sputnik, Արմենուհի Մխոյան. Հանրապետության երկրորդ քաղաքի կենտրոնական հրապարակում անցկացվող հետաքրքիր իրարանցումը տպավորիչ էր ոչ միայն փոքրիկ գյումրեցիների, այլ նաև Գյումրի այցելած հյուրերի համար: ԱՄՆ-ից Գյումրի ժամանած Հայ-ամերիկյան առողջության կենտրոնի բժիշկներից շատերի համար այս իրադարձությունը հաճելի անակնկալ էր. հենց առաջին այցին նման տոնակատարություն էին տեսնում:
«Ես Կալիֆոռնիայից եմ: Իրոք, անչափ հաճելի է Հայաստանի անկախության օրը լինել այստեղ` Հայաստանում: Մեծ բավականություն ստացա»,- նշեց բժիշկ Ռոն Բրաունը՝ հավատացնելով, որ այս ամենը տեսնելուց հետո կրկին կցանկանա Հայաստան վերադառնալ:
Ի տարբերություն Ռոնի, Քամիլա Նքոբբի համար սա արդեն 4-րդ այցն է Հայաստան, երկրորդը` Գյումրի:
«Այս այցն ավելի քան տպավորիչ էր, որովհետև զուգորդվեց Անկախության տոնին նվիրված տոնական միջոցառմամբ»,- ասաց Քամիլան:
Գյումրու կայազորն արդեն մի քանի տարի է` Անկախության օրը Գյումրիում ինչ-որ չափով տոնի է վերածում՝ որոշակի տեխնիկայի ցուցադրություն, զինվորական հնարքների բանեցում, զինվորական ձեռնամարտ, արտակարգ իրավիճակներում արագ գործելու կարողություն, շարային քայլերթ՝ զինվորական նվագախմբի քայլերգերի նվագակցությամբ:
Այսօր` սեպտեմբերի 21-ին, Գյումրու կենտրոնական հրապարակում զինվորական շքերթին փոխարինեց տոնական համերգը, որի ժամանակ հայկական ժողովրդական պարեր ցուցադրեցին և՛ պարողները, և՛ զինվորները:
