ԵՐԵՎԱՆ, 21 սեպտեմբերի — Sputnik, Լաուրա Սարգսյան. Մեծ ռեժիսոր Սերգեյ Փարաջանովի «Լացող Ջոկոնդան» կոլաժի հիման վրա դիզայներ Արամ Նիկոլյանի արած ինստալյացիան այսօրվանից զարդարելու է Երևանի կենտրոնական փողոցներից մեկը։
«Փարաջանովը փառահեղ աշխատանքը վերցրել ու իր միջով է անցկացրել և չի վախեցել ներկայացնել այն այնպես, ինչպես տեսնում է։ Նա ամենաանվախ ու ազատ արվեստի գործիչն է», – ասել է Նիկոլյանը Sputnik Արմենիային տված հարցազրույցում։
Հայաստանի և Վրաստանի մշակույթի նախարարներ Արմեն Ամիրյանն ու Միխայիլ Գիորգաձեն կարևորում են, որ ինստալյացիան բացվեց հենց Հայաստանի անկախության օրը։
«Խորհրդանշական է, որ ինստալյացիայի բացումը տեղի ունեցավ Հայաստանի անկախության օրը, քանի որ Փարաջանովը անկախության և ազատության մարմնավորում է», – ասել է Ամիրյանը։
Սակայն սրանով երկրի հյուրերի և բնակիչների համար նախատեսված անակնկալները չեն ավարտվում։ Մեկ ամսվա ընթացքում հասանելի է լինելու բջջային հեռախոսների համար նախատեսված ապլիկացիան. կոլաժի ֆոնին լուսանկարվելով`կարելի է ըստ ցանկության ստանալ Փարաջանովի 12 կտավների լուսանկարներից մեկը։
«Խորհրդանշական է, որ մենք միասին բացեցինք Փարաջանովի կոլաժը, մի մարդու, որի արվեստը երկու ժողովուրդներին է պատկանում։ Փարաջանովը մեր երկրները կապող կամուրջ է», – ասել է Գիորգաձեն։
Փարաջանովին հայ և վրացի ժողովուրդների հպարտությունն է համարում նաև Հայաստանում Վրաստանի արտակարգ և լիազոր դեսպան Գեորգի Սագանելիձեն։
«Փարաջանովը մեր հպարտությունն է և մեր մշակույթի կարևորագույն մասը», – Sputnik Արմենիայի թղթակցի հետ զրույցում ասաց Սագանելիձեն։
Նրա խոսքով` մշակույթը լավ հնարավորություն է երկկողմ հարաբերությունների խորացման, ժողովուրդների մերձեցման համար։
