ԵՐԵՎԱՆ, 21 սեպտեմբերի — Sputnik. Կլինի պաշտոնյա, թե շարքային քաղաքացի, բոլորը պետք է կատարեն ամենօրյա քրտնաջան աշխատանք`այդքան դժվարությամբ ձեռքբերված անկախությունը պահպանելու համար: Այս մասին հայտնեց փոխարտգործնախարար Շավարշ Քոչարյանը պաշտպանության նախարարության վարչական տարածքում կազմակերպված միջոցառման ժամանակ:
«Մեր պապերի երազանքն էր՝ ունենալ անկախություն: Միայն նախորդ դարի ընթացքում մենք երկու անգամ անկախություն ունեցանք, մեկն արագ կորցրինք, մյուսը սա է: Պետք է այնպես անենք, որ հազարամյակների ընթացքում այլևս երբեք չընդհատվի հայոց անկախությունը»,-ասաց Քոչարյանը:
Նրա խոսքով՝ մենք միաժամանակ երկու հայկական պետություն ունենք, ամբողջ խնդիրն այն է, որ մեկը դեռ ճանաչված չէ:
«Մեր խնդիրն այն է, որ երկրորդն էլ ճանաչվի»,-ասաց նա:
Sputnik Արմենիայի այն հարցին, թե ինչ պետք է սպասել երիտասարդ Հայաստանից, Քոչարյանը պատասխանեց՝ ինչքան շուտ հասունանա, այնքան լավ։
Անկախությունը եթերային երևույթ է համարում ՀՀ արդարադատության նախարար Դավիթ Հարությունյանը:
«Դա մի բան է, որն այնքան է մտել մեր արյան մեջ, որ արդեն չենք կարող պատկերացնել մեզ որևէ այլ կերպ: Անկախությունը չի կարող միայն պահպանվել: Դա մի կողմից կայացած փաստ է, մյուս կողմից՝ անընդհատ մարտահրավերներ նետող»,-ասաց Հարությունյանը:
Հիշեցնենք, որ այսօր պաշտպանության նախարարության վարչական շենքում կազմակերպվել էր տոնական միջոցառում՝ նվիրված ՀՀ անկախության 26-րդ տարեդարձին:
