ԵՐԵՎԱՆ, 20 սեպտեմբերի — Sputnik. Մեքսիկայի փրկարար ծառայության ղեկավար Լուիս Ֆելիպե Պուենտեն տեղեկացրել է, որ երկրաշարժի հետևանքով Մեքսիկայում, ընդհանուր առմամբ, 226 մարդ է մահացել։
«Տվյալ պահին գիտենք 226 մահացածի մասին», – ասվում է Պուենտեի հայտարարության մեջ։ Այս մասին գրում է ՌԻԱ Նովոստին։
Միաժամանակ, Մեքսիկայի նախագահ Էնրիկե Պենիա Նիտոն հայտնել է, որ մոտ 38 մարդ համարվում է անհայտ կորած։
Մեքսիկայի կրթության նախարար Աուրելիո Նունյեն էլ տեղեկացրել է, որ առնվազն 30 մարդ զոհվել է դպրոցների փլուզման հետևանքով։
Հզոր երկրաշարժի հետևանքով Մեխիկո քաղաքի տարածքի գրեթե կեսն առանց էլեկտրականության է մնացել, հայտնել է Մեքսիկայի նախագահ Էնրիկե Պենիա Նիտոն։
Նա տեղեկացրել է, որ տուժած նահանգների տարածքում օգնության կարիք ունեցողների համար ապաստաններ են բացվել։ Նախագահը կոչ է արել բնակիչներին տնից դուրս չգալ։
Մեքսիկայի ներքին գործերի նախարարը Մեխիկոյում արտակարգ իրավիճակ է հայտարարել։
