ԵՐԵՎԱՆ, 20 սեպտեմբերի — Sputnik. ԵՄ-ն կոչ է անում Իրաքյան քրդերին չեղյալ հայտարարել անկախության մասին հանրաքվեն` վստահեցնելով, որ այդ քայլը սխալ կլինի։ Այդ մասին հայտարարել է ԵՄ դիվանագիտության ղեկավար Ֆեդերիկա Մոգերինին, հայտնում է ՌԻԱ Նովոստին։
Իրաքից առանձնանալու մասին հանրաքվեն Իրաքյան Քրդստանի իշխանությունները որոշել էին անցկացնել սեպտեմբերի 25-ին։ Մինչդեռ Բաղդադի խորհրդարանը քվեարկությունն անօրինական է ճանաչել։
Մոգերինիի խոսքով` ԵՄ-ն կողմ է Իրաքի միասնականությանը, ինքնիշխանությանն ու տարածքային ամբողջականությանը։
«Պետք է խուսափել հանրաքվեից։ ԵՄ-ն ընդունում է Քրդստանի և Բաղդադի իշխանությունների միջև չլուծված հարցերի առկայությունը և համարում, որ դրանք պետք է լուծվեն «կառուցողական և խաղաղ երկխոսության ճանապարհով, որը կտանի դեպի երկկողմ համաձայնեցված որոշման` հիմնված Իրաքյան սահմանադրության դրույթների կատարման վրա», — նշել է արտաքին գործերի և անվտանգության քաղաքականություն գծով ԵՄ բարձրագույն ներկայացուցիչը։
ԵՄ-ն ողջունում է երկխոսության աջակցմանն ուղղված ՄԱԿ-ի նախաձեռնությունը և իր օգնությունն առաջարկում համապատասխան հայց ստանալու դեպքում։
ԱՄՆ-ի, Ֆրանսիայի, Գերմանիայի և ՄԱԿ-ի ներկայացուցիչները Իրաքյան Քրդստանի ղեկավար Մասուդ Բարզանիի հետ հանդիպման ժամանակ առաջարկել են հետաձգել հանրաքվեն, սակայն նա պատասխանել է, որ քվեարկությունը կանցկացվի նշված օրը։
Ավելի ուշ Բարզանին հայտարարել է, որ արևմտյան երկրներն այլընտրանք են առաջարկել, սակայն անկախության հանրաքվեի անցկացման հարցերով զբաղվող բարձրագույն հանձնաժողովը մերժել է այդ առաջարկը։
Իրաքը, Իրանը, Թուրքիան և արաբական պետությունների լիգան խստորեն քննադատել են սպասվող հանրաքվեն։
