ԵՐԵՎԱՆ, 20 սեպտեմբերի — Sputnik. «Եվրանեսթ» խորհրդարանական վեհաժողովի հայաստանյան պատվիրակության անդամ Մանե Թանդիլյանը Բաքու չմեկնելու պատճառ չի տեսնում։ Այս մասին նա հայտնեց Sputnik Արմենիայի հետ զրույցում։
«Մենք որևէ խնդիր չունենք, որևէ առանձնահատուկ բան չի կատարվում»,- ասաց նա` հիշեցնելով, որ «Եվրանեսթի» նիստերն ամեն անգամ տեղի են ունենում անդամ երկրներից որևէ մեկում, այս անգամ` Բաքվում։ Հայկական պատվիրակությունն էլ որոշում է կայացրել մասնակցել նիստին, քանի որ ստացել է անվտանգության երաշխիքներ։
«Մեր երկրի այլ պատվիրակության անդամներ տարբեր առիթներով այնտեղ եղել են, այնպես որ առաջինը չէ, վերջինը չի լինելու։ Անհանգստանալու ոչինչ չկա»,- ասաց Թանդիլյանը։
Հայաստանյան պատվիրակության անդամ Թանդիլյանը Բաքվում նաև զեկույց է ունենալու։
«Եվրանեսթ» խորհրդարանական վեհաժողովի հայաստանյան պատվիրակության ղեկավար Արմեն Աշոտյանն ու պատվիրակության անդամ Մանե Թանդիլյանը վաղը` սեպտեմբերի 21-ին Բաքվում կմասնակցեն վեհաժողովի սոցիալական, կրթության, մշակույթի և քաղաքացիական հասարակության հարցերի հանձնաժողովի կողմից կազմակերպված համաժողովին:
Համաժողովը նվիրված է կանանց առողջության և գենդերային հավասարության խթանմանը:
