ԵՐԵՎԱՆ, 19 սեպտեմբերի — Sputnik. Հայաստանի տնտեսությունը ճիշտ ուղու վրա է: Այս համոզմունքն այսօր հայտնեց վարչապետ Կարեն Կարապետյանը Երևանում կազմակերպված Հայաստան-Սփյուռք համաժողովի ընթացքում:
«Մեկ տարվա ընթացքում գրանցել ենք տնտեսական աճ՝ 6.2 տոկոս, բյուջեի մուտքերն աճել են 6 տոկոսով, արտահանման 21.6 տոկոսի, իսկ ներմուծման 28.8 տոկոսի աճ կա»,-ասաց Կարապետյանը:
Վարչապետը հայտնեց՝ իրենք գիտակցում են, որ տնտեսության ակտիվության այս թվերը բավարար չեն, բայց մեկ տարվա գործունեությունը նա դրական գնահատեց:
Նա ասաց, որ արտահանման ու ներմուծման շեշտակի աճ ապահովելու համար լայնաֆորմատ համագործակցություն են նախատեսում:
«Մենք արդեն իսկ մուտք ենք գործել ԵԱՏՄ շուկա, համագործակցում ենք հարևան Իրանի հետ՝ ութսուն և ավելի միլիոնանոց շուկայով, սահմանին ազատ տնտեսական գոտի է ստեղծվում: Մյուս ուղղություններն են՝ Եվրամիություն, ԱՄՆ, GSP+ համակարգ»,- ասաց Կարապետյանը:
Նա չմոռացավ նշել Վրաստանի մասին, որի հետ կնքվել է ազատ առևտրի համաձայնագիր: Վարչապետը շեշտեց՝ միայն համատեղ ուժերով կկարողանան այս բոլոր ծրագրերում հաջողություն գրանցել:
