ԵՐԵՎԱՆ, 18 սեպտեմբերի – Sputnik. Լոռու մարզում գտնվող Քոբայրի վանքն անասնագոմի է վերածվել։ Այս մասին վկայող լուսանկարներն ու տեսանյութը հրապարակել է Ֆեյսբուք սոցիալական ցանցի օգտատեր Ներսես Մատինյանը։ Օգտատերերը չեն կարողացել զսպել իրենց զայրույթը և մեկնաբանություններ են հրապարակել լուսանկարների տակ։
«Մարկեսն ասում է՝ «Բազմացե՛ք, կովեր, կյանքը կարճ է»։ Հետևեք իմաստունի խորհրդին, կերեք ձեր խոտը, կշտացեք ու բազմացեք խելքից դուրս, բայց դուրս մի՛ եկեք ձեր փարախի սահմաններից։ Մի՛ մտեք հայոց լեզվի տաճարը, մի՛ շփոթեք այն ախոռի հետ»,- գրել է օգտատերերից մեկը։
Մեկ ուրիշն էլ նշել է, որ սա ուղղակի խայտառակություն է. այսպե՞ս ենք հարգում ու պահպանում մեր սրբավայրերը:
Քոբայրի վանք կամ Քոբայրավանքը միջնադարյան հայկական վանք է Հայաստանի Լոռու մարզում, Քոբայր գյուղի մոտ, Դեբեդ գետի ձորալանջին, բարձրադիր ու դժվարամատչելի վայրում։
