ԵՐԵՎԱՆ, 18 սեպտեմբերի — Sputnik. Արամ Ա կաթողիկոսն իր ելույթում Աստվածաշնչից մեջբերում արեց՝ նշելով՝ ժամանակի նշանները պետք է ճիշտ կարդալ, ախտաճանաչումը ճիշտ կատարել:
«Սփյուռքը կմաշվի, եթե պատահական միջոցառումներով փորձենք երկրի վերքերը փարատել»,-ասաց Արամ Ա կաթողիկոսը:
Նրա խոսքով՝ Հայաստանն ու Սփյուռքը գործընկերներ չեն, նրանք նույն ազգի զավակներն են: Հետևաբար, այս մեխանիզմը պետք է դրվի կայուն ապագայի հիմքում:
«Հայաստանը զբոսավայր չէ, բիզնեսի շուկա չէ, անցագիր չէ, վայ մեզ, եթե միայն այսպես մոտենանք Հայաստանին: Հայաստանը հայու հավանական տունն է, անցյալի, ներկայի ու ապագայի տունը: Մեր հավաքական տան նկատմամբ անելիք և ասելիք ունենք և պետք է ունենանք. պետք է հզորացնենք այն մեր ողջ կարողությամբ»,-ասաց նա:
Արամ Ա կաթողիկոսը շեշտեց, որ Սփյուռքի հզորացումը Հայաստանի հզորացումն է, գործընթացը պետք է լինի փոխադարձաբար:
