ԵՐԵՎԱՆ, 18 սեպտեմբերի — Sputnik. Սփյուռքն ավելի մեծ շեշտադրում պետք է անի այն հարցերին, որոնք վերաբերում են Լեռնային Ղարաբաղին: Այս մասին հայտնեց ՀՀ փոխարտգործնախարար Շավարշ Քոչարյանը` Հայաստան-Սփյուռք համաժողովի իր մասնակցությամբ նիստից հետո:
«Հայաստանը դարձել է առաջամարտիկ մարդկության դեմ հանցագործությունների կանխարգելման հարցում: Դա պետք է շարունակվի: Առանց հակադրելու, միաժամանակ, շատ ավելի լուրջ շեշտադրմամբ պետք է առաջ մղվեն այն հարցերը, որոնք կապված են Արցախի Հանրապետության հետ»,-ասաց Քոչարյանը:
Նրա խոսքով՝ Սփյուռքը մեծ ազդեցություն ունի միջազգային կազմակերպություններում ձևավորվող կարծիքի վրա: Այդ տեսանկյունից, ըստ նրա, Սփյուռքի դերը պարզապես անգնահատելի է:
«Այսօր Սփյուռքը մեծ դերակատարում ունի ճշմարտությունը մատուցելու հարցում: Չէ որ տեղի է ունենում բացահայտ քարոզչական պատերազմ: Խոսքը վերաբերում է նաև Արցախի տնտեսական զարգացման գործում նրանց ավանդին: Ի վերջո, նրանք իրենց աջակցությունն են ցույց տալիս նաև բանակին»,-ասաց Շավարշ Քոչարյանը:
Քոչարյանը նշեց, որ մեզ հայտնի է տարբեր երկրներում ադրբեջանական քարոզչական ակտիվության մասին: Միաժամանակ, փոխարտգործնախարարը վստահություն հայտնեց, որ բոլոր այդ գործողությունները բումերանգի պես շրջվում են նրանց դեմ:
«Չի կարելի խաղալ մարդկանց թուլությունների վրա: Այն, ինչ անում էր Ադրբեջանը, ապտակ էր Եվրոպային: Եվրոպայի սրտում պաշտոնյաներին կաշառում են»,-ասաց նա:
Ըստ Քոչարյանի՝ Հայաստանը շարժվում է ավանդական եղանակով, այսինքն՝ Սփյուռքում հայ համայնքները շարժվում են օրենքի համաձայն և մեր արտաքին դիվանագիտական գիծն առաջ տանում:
