ԵՐԵՎԱՆ, 18 սեպտեմբերի — Sputnik. Բժիշկները համակարծիք են, որ Ադրբեջանի՝ ինքնասպանության փորձի վարկածը քննադատության չի դիմանում, Ֆեյսբուքում գրել է բլոգեր Ալեքսանդր Լապշինը` նշելով, որ ամբողջ օրն անցկացրել է հոսպիտալում և ադրբեջանական բանտում բռնության մասին փաստաթղթեր է հավաքել:
«Ծեծի հետքերն ակնհայտ են: Կշարունակենք աշխատել նաև հետագայում»,- գրել է նա:
Նշենք, որ Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։ Ադրբեջանի նախագահի հրամանով նրան ներում շնորհվեց սեպտեմբերի 11-ին։
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան «սև ցուցակի» մեջ էր ընդգրկել առանց Բաքվի համաձայնության Արցախի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին:
Ավելի ուշ Ադրբեջանի նախագահը ներում էր շնորհել բլոգերին, և նա ազատ էր արձակվել, որից հետո բլոգերը պատմել էր, որ նրան ծեծի են ենթարկել, սակայն դա հանրությանը ներկայացվել է որպես ինքնասպանության փորձ, որպեսզի հետո այդ միջադեպն օգտագործվի որպես «ներման ձևական պատճառ»։
