ԵՐԵՎԱՆ, 16 սեպտեմբերի — Sputnik, Նելլի Դանիելյան. Հայաստանում այս տարի գրանցված շոգ ու չոր ամառը բացասաբար է ազդել գրեթե բոլոր ջրային ավազանների վրա։ Հայաստանի ամենասառը տարածքում՝ Շիրակի մարզում, Ախուրյանի ջրամբարից բացի, շուրջ 10 անգամ նվազել է նաև Աշոցքի տարածաշրջանում գտնվող Արփի լճի ջրի ծավալը։
«Այս տարի Հայաստանի բոլոր լճերն են այդ վիճակում, բայց մենք 70 մլն-ից 7 մլն-ը կարողացանք պահպանել»,- Sputnik Արմենիայի հետ զրույցում ասաց «Արփի լիճ» ազգային պարկի տնօրենի գիտական գծով տեղակալ Արտակ Ֆարզացյանը։
Նրա խոսքով, եթե առաջիկա ձմեռը տեղումնառատ լինի, լճի նախկին ծավալը հնարավոր կլինի վերականգնել։ Այս պահին լճից բացթողումը դադարեցված է, բայց տեղումների բացակայության հետևանքով լիճը սնուցող լեռնային 5 գետակները գրեթե ցամաքել են։ Արփի լճի ծավալը, սովորաբար, գերազանցում է 100 մլն խմ-ը, բայց այս տարի գարնանն այն ընդամենը 70 մլն-ի էր հասել։
Արփի լիճը Սևանից հետո Հայաստանի՝ մեծությամբ երկրորդ քաղցրահամ լիճն է։ Այն բնական չէ, փոքրիկ լճակը լճի է վերածվել 1946-1950 թ.թ. ընթացքում` ջրային պատնեշի կառուցման արդյունքում։ Լճի մակերեսն անբնական տատանվում է ամբողջ տարվա ընթացքում: Արփի լճից Ախուրյան թափվող ջրերն առաջացրել են ջրանցք։ Խոնավ տարածքներում Ամբարտակի կառուցումից հետո Արփի լիճը դարձավ Խորհրդային Հայաստանի, ապա Հայաստանի Հանրապետության՝ մեծությամբ երկրորդ ջրային տարածքը:
