ԵՐԵՎԱՆ, 15 սեպտեմբերի — Sputnik. Հայաստանը դեռ երկար կսպասի Իսրայելի դիվանագիտական ներկայացուցչության բացմանը։ Sputnik Արմենիա մամուլի կենտրոնում այսպիսի տեսակետ հայտնեց Քնեսեթի նախկին պատգամավոր Ալեքսանդր Ցինկերը։
«Իսրայելի դիվանագիտական ներկայացուցչության բացումը հիմնականում կապված է ֆինանսական խնդիրների հետ։ ԱԳՆ-ի հատուկ բաժինն է որոշում, թե որքանով է նպատակահարմար այս կամ այն երկրում ներկայացուցչություն բացելը»,- ասաց Ցինկերը։
Նրա խոսքով` Երևանում դիվանագիտական ներկայացուցչություն չբացելու պատճառը քաղաքական չէ։ Այս պահին երկու երկրի առաջ ծառացած գլխավոր խնդիրը վիզային ռեժիմի չեղարկումն է։ Իսրայելը վիզային ռեժիմը չեղարկել է Վրաստանի հետ, բայց հետևանքն այնքան էլ գոհացուցիչ չի եղել։
«Վիզային ռեժիմի չեղարկումից հետո Վրաստանի քաղաքացիներից շատերը եկան Իսրայել և քաղաքական ապաստան խնդրեցին։ Քանի դեռ համապատասխան ծառայությունները քննում էին նրանց գործերը, այդ մարդիկ հաստատվեցին Իսրայելում»,- նշեց Ցինկերը։
Վիզային ռեժիմի ազատականացման հարցը քննարկվել է նաև Իսրայելի տարածքաշրջանային համագործակցության նախարար Ցախի Հանեգբիի երևանյան այցի ժամանակ։
