ԵՐԵՎԱՆ, 14 սեպտեմբերի — Sputnik. Վերնիսաժի հարևանությամբ հնչած կրակոցներից տուժած Վահագն Աբգարյանի վիճակը գնահատվում է կայուն ծանր։ Այս մասին Sputnik Արմենիայի հետ զրույցում հայտնեց «Աստղիկ» բժշկական կենտրոնի գլխավոր բժիշկ Ռոբերտ Կուրղինյանը։
Նրա խոսքով`վիրահատությունը հենց նոր է ավարտվել, արդեն արթնացնում են հիվանդին։
«Անմիջական վտանգներ այս պահին չեմ տեսնում։ Մոտ 3 ժամ տևեց նրա վիրահատությունը։ Վիրահատում էին մեր վնասվածքաբանները և միկրովիրաբույժները, որովհետև վնասումները կապված էին աջ արմունկային հոդի շրջանում ոսկրերի կոտրվածքի հետ»,- ասաց բժիշկը։
Նա տեղեկացրեց, որ ամբողջովին վնասված էր Աբգարյանի ծնկային ներվը, այնտեղի անոթները և մակերեսային բոլոր մկանները։ Միկրովիրաբույժներն արդեն վերականգնել են դրանց ամբողջականությունը։
