ԵՐԵՎԱՆ, 14 սեպտեմբերի — Sputnik. Հայաստանի Ազգային ժողովի փոխնախագահ, ՀՀԿ խոսնակ Էդուարդ Շարմազանովը Հայաստանի և Ադրբեջանի արտաքին գործերի նախարարներ Էդվարդ Նալբանդյանի և Էլմար Մամեդյարովի առաջիկա հանդիպումից էական ակնկալիքներ չունի:
«Ադրբեջանն իրականացնում է քաղաքականություն, որը չի բխում բանակցային գործընթացի տրամաբանությունից», — ՀՀԿ ԳՄ նիստից հետո լրագրողներին ասաց նա։
Նրա խոսքով` վերջերս Ադրբեջանի նախագահը Իսլամական համագործակցության կոնֆերանսում կրկին խոսեց ոչ քաղաքական լեքսիկոնով, սկսեց ստեր տարածել, թե Հայաստանում մահմեդականների իրավունքները ոտնահարվում են, թե Հայաստանում իսլամաֆոբիա է տարածվում, Արցախն էլ իրենց պատմական տարածքն է։
Շարմազանովը շեշտեց` հայկական կողմը Մինսկի խմբի համանախագահության ձևաչափի առաջարկած երեք հիմնական սկզբունքների հիման վրա և բանակցային ճանապարհով խնդրի կարգավորման կողմնակից է:
«Սակայն ապրիլյան գործողություններից հետո եղել է երկու գագաթնաժողով Վիեննայում և Սանկտ Պետերբուրգում, և Ադրբեջանը պարտավոր է կատարել այդ գագաթնաժողովների ժամանակ ձեռք բերված պայմանավորվածությունները, որովհետև առանց դրա անհնար է ակնկալել որևէ առաջընթաց»,- ասաց նա:
Նշենք, որ Էդվարդ Նալբանդյանն ու Էլմար Մամեդյարովը սեպտեմբերին կհանդիպեն ՄԱԿ-ի գլխավոր վեհաժողովի հարթակում։
