ԵՐԵՎԱՆ, 14 սեպտեմբերի — Sputnik. Հայաստանի հանրապետական կուսակցությունը դրական է գնահատում վարչապետ Կարեն Կարապետյանի կառավարության մեկամյա գործունեությունը։ Սեպտեմբերի 14-ին ՀՀԿ Գործադիր մարմնի նիստից հետո այս մասին ասաց ԱԺ փոխնախագահ Էդուարդ Շարմազանովը։
Նա հայտնեց, որ կուսակցության գործադիր մարմնում քննարկել են Կարապետյանի կառավարության մեկամյա հաշվետվությունը և դրական գնահատել Կարապետյանի կաբինետի մեկամյա գործունեությունը։
«Հստակ թվեր են ամրագրված։ Ավելի քան վեց տոկոս տնտեսական ակտիվություն կա, տուրիզմի, արտահանման աճ կա։ Թե՛ ԵԱՏՄ շուկայում, թե՛ եվրոպական ու իրանական շուկայում արտահանումն ավելացել է»,- նշեց Շարմազանովը։
Նա վստահեցրեց, որ այն չափորոշիչները, որոնք ամրագրել են պետբյուջեի նախագծում, անկասկած կատարվելու են։
«Քաղաքական մեծամասնության առաջարկած 850 մլն դոլար ներդրումից արդեն 45 տոկոսը կատարված է։ Ընդ որում, հաշված չեն մասնավոր ներդրումները»,- ասաց Շարմազանովը։
Նրա խոսքով` դա էլ հաշվելու դեպքում թիվն ավելի բարձր կարող է լինել։
