ԵՐԵՎԱՆ, 13 սեպտեմբերի — Sputnik. Ռուսաց լեզվի խորացված ուսուցմամբ դպրոցների և դասարանների (ինչպես նաև ռուսերենով ուսուցմամբ դասարանների) թիվը կարող է ավելանալ։ ՀՀ կրթության և գիտության նախարարությունը մշակել ու հանրությանն է ներկայացրել Հայաստանի Հանրապետության հանրակրթական ծրագրեր իրականացնող ուսումնական հաստատություններում ռուսաց լեզվի դասավանդման հայեցակարգը։
Ինչպես նշվում է փաստաթղթում, Հայաստանի Հանրապետության կրթական համակարգում անհրաժեշտ է կատարել բարեփոխումներ, որոնք քաղաքացիներին հնարավորություն կտան տիրապետելու մի քանի օտար լեզվի, ինչպիսիք են ռուսերենը, մեկ կամ մի քանի եվրոպական (անգլերեն, ֆրանսերեն, գերմաներեն և այլն) և արևելյան (արաբերեն, պարսկերեն, չինարեն և այլն) լեզուներ:
«Ռուսաց լեզվի տիրապետումը հանդիսանում է քաղաքացու մրցակցային առավելությունը բարձրագույն կրթություն ստանալիս և մասնագիտական հմտություններ ձևավորելիս»,– գրված է նախագծի տեքստում։
Նոր բարեփոխումների համաձայն՝ նախատեսվում է նաև ռուսաց լեզվի խորացված ուսուցմամբ դպրոցների և դասարանների (ինչպես նաև ռուսերենով ուսուցմամբ դասարանների) թվի ավելացում։ Բացի հայերենով առարկաների ուսումնասիրությունը, ծրագրում ներառված կլինեն առարկաներ ռուսաց լեզվով բարձր դասարանների համար։
««Ռուսաց լեզու» առարկայի պետական ամփոփիչ ատեստավորման ժամանակ ոչ միայն գրավոր, այլ նաև բանավոր խոսքի տիրապետման մակարդակի գնահատում է իրականացվելու»,– գրված է հայեցակարգի նախագծում։
Նախագծի նախաձեռնողները նպատակ ունեն բարձրացնել կրթական համակարգի բոլոր աստիճաններում (նախադպրոցական, դպրոցական, բուհական) ռուսաց լեզվի և այլ լեզուների ուսուցման որակը:
Բացի այդ, ռուսաց լեզվի ուսուցիչները վերապատրաստման դասընթացներ կանցնեն և կբարձրացնեն իրենց գիտելիքների մակարդակը։
