Պապիլոմա հիվանդությունը կանխարգելելու համար առողջապահության նախարարությունն այս տարվա դեկտեմբերից ներդնում է պապիլոմա վիրուսի դեմ պատվաստանյութը։ Այս նորամուծությունը, սակայն, միանշանակ չի ընդունվում հանրության կողմից: Ծրագրի ընդդիմախոսների պնդմամբ, այն կարող է խթանել, ոչ թե նվազեցնել հիվանդության տարածումը: Առողջապահության պատասխանատուները շտապում են զգուշացնել, որ պատվաստանյութում կենդանի վիրուս չկա:
«Այն սպիտակուցի բաղադրատոմսի առանձին հատվածներից է կազմված, ուստի հիվանդացության ռիսկը զրոյացվում է: Պատվաստանյութն արդեն ներդրվել է աշխարհի 70 երկրում։ Պատվաստումից առաջ, ինչպես բոլոր դեպքերում, երեխան կանցնի բուժզննում»,- Sputnik Արմենիայի հետ զրույցում ասաց ՀՀ ԱՆ իմունականխարգելման ազգային ծրագրի պատասխանատու Գայանե Սահակյանը։
Հայաստանում այս ծրագիրը կիրականացվի GAVI-ի միջոցով: ԱՀԿ-ը խորհուրդ է տալիս այս պատվաստումը կատարել 9-13 տարեկան աղջիկների շրջանում, քանի որ այն արդյունավետ է հորմոնալ հասունացման ժամանակահատվածում,երբ աղջիկները դեռևս չեն սկսել սեռական կյանքով ապրել, այսինքն՝ չեն կարող պապիլոմա վիրուսով արդեն վարակված լինել: Հայաստանում, հաշվի առնելով տեղական առանձնահատկությունները, որոշվել է պատվաստել 13 տարեկան աղջիկներին։
Մարդու պապիլոմա վիրուսը փոխանցվում է սեռական ճանապարհով: Վիրուսի որոշ տեսակներ առաջացնում են արգանդի վզիկի քաղցկեղ: Մեր երկրում 100 հազար կնոջից 15-ը տառապում է արգանդի վզիկի քաղցկեղով: Նախորդ տարի արձանագրվել է 2999 դեպք: Կամ բացահայտումներն են ավելացել, կամ հիվանդությունն է գլուխ բարձրացնում: Ամեն տարի այս չարաբաստիկ հիվանդության հետևանքով մահանում է 120 130 կին: Արգանդի վզիկի քաղցկեղով մահվան դեպքերը երկրորդ տեղում են կրծքագեղձի չարորակ նորագոյացություններից հետո:
