ԵՐԵՎԱՆ, 12 սեպտեմբերի–Sputnik. Հանրապետական խմբակցության անդամ Արմեն Սահակյանը «Ելք» խմբակցության անդամ Անահիտ Բախշյանի մասին խոսելիս ասաց «պարոն»։ «Ելքի» մեկ այլ անդամ Ալեն Սիմոնյանն էլ բարկացավ ու նրան անվանեց «Ծիտ»։ Վեճի տարրեր պարունակող երկխոսությունը ծավալվեց Երևանի ավագանու այսօրվա` սեպտեմբերի 12-ի նիստում։ Մեր տեղեկություններով`Արմեն Սահակյանի մականունը հենց այդպես է։
««Ծի՛տ», լսի՛, այ տղա չի քո համար»,– ասաց Ալեն Սիմոյանը։
Հետո «Ելք» խմբակցության անդամը դիմեց Երևանի քաղաքապետին, որը պատրաստվում էր մարել կրքերը։
«Պարոն քաղաքապետ, մենք պետք է բոլորս էթիկայի կանոնները պահենք: Ձեր խմբակցության անդամը մեր խմբակցության անդամին, որը տարեց կին է, «արա»-ով, «պարոն Բախշյան»-ով է դիմել»,–ասաց Սիմոնյանը։
Երևանի քաղաքապետը հորդորեց չխանգարել նիստերի քննարկման ընթացքը և կողմերին կոչ արեց միմյանց հանդեպ հարգալից վերաբերմունք դրսևորել։
