ԵՐԵՎԱՆ, 12 սեպտեմբերի — Sputnk. 2016 թ.-ի սեպտեմբերից մինչև 2017 թ.-ի օգոստոսը ՊԵԿ-ը բյուջե է վերադարձրել բյուջեից թաքցված 1 տրիլիոն 139 մլրդ դրամ ստվերային եկամուտ։ Այս մասին այսօր լրագրողների հետ հանդիպմանն ասաց ՊԵԿ փոխնախագահ Վախթանգ Միրումյանը։
ՊԵԿ-ը ԱԺ է ներկայացրել արտադրական սարքավորումների և հումքի ներմուծումն ԱԱՀ-ից ազատելու նախաձեռնություն։
Խորհրդարանի հավանությանն արժանանալու դեպքում ՊԵԿ օրենսդրական նախաձեռնությունն ուժի մեջ կմտնի 2018թ-ի հունվարի 1-ից։ Այսօր լրագրողների հետ հանդիպմանը, անդրադառնալով նախագծին, ՊԵԿ նախագահի տեղակալ Վախթանգ Միրումյանը հայտնեց, որ թեև 2016-ին սարքավորումների և հումքի ներմուծման համար պետբյուջե վճարված հարկերը կազմել են 40 մլրդ դրամ, բայց ՊԵԿ-ում վստահ են, որ այդ նվազեցումը բյուջեի եկամուտների վրա էական ազդեցություն չի ունենա։
«Ժամանակային ազդեցությունը տվյալ տարվա ընթացքում, իհարկե, պարունակում է եկամուտների որոշակի ճեղք։ Այդ ճեղքը լրացնելու համար մենք պետք է օգտագործենք վարչարարական ռեսուրսները, ստվերից ունենանք ավելի շատ հավաքագրված եկամուտներ»,- ասաց Միրումյանը։
Ի դեպ, ստվերի կրճատման ուղղությամբ իրականացվող աշխատանքի արդյունքում 2016 թ.-ի սեպտեմբերից մինչև 2017 թ.-ի օգոստոսն ընկած ժամանակահատվածում ՊԵԿ-ին հաջողվել է բյուջե վերադարձնել ավելի քան 1 տրիլիոն 139 մլրդ դրամ, ինչը 70.8 մլրդ-ով գերազանցում է նախորդ տարվա նույն ժամանակաշրջանի ցուցանիշը:
Հարկային վարչարարության արդյունավետության բարձրացման արդյունքում էլ նույն ժամանակահատվածում 175 հարկատուներից գանձվել է շուրջ 56.5 մլրդ դրամի ԱԱՀ-ի գումար:
ՊԵԿ-ում անգամ հաշվարկել են ստվերային եկամուտների միջին ամսական ռիսկի չափը։ Այն այս տարվա օգոստոսի 1-ի դրությամբ շուրջ 2.8 մլրդ դրամ է:
Միաժամանակ սահմանային անցակետերում շարունակվում է ժամանակակից տեղեկատվական տեխնոլոգիաների ներդրումը, որը Միրումյանի խոսքով, նվազեցվում է մաքսավոր-հայտարարատու անմիջական շփումը` բարձրացնելով մաքսային հսկողության արդյունավետությունը:
