ԵՐԵՎԱՆ, 11 սեպտեմբերի — Sputnik. Դեր Զորի պաշարումից փրկված երեխաները ժամանակից շուտ մեծացան։ Նրանք հոգնել են անդադար ռմբակոծություններից և երազում են նախկին կյանքին վերադառնալ։
«Ես երջանիկ եմ, որ մեզ ազատել են։ Ափսոս, որ հայրս, որն ընկավ դիպուկահարի կրակից, չի կարողանա վայելել այս ուրախությունը մեզ հետ։ Նա միշտ ասում էր, որ մենք մեր հողն ահաբեկիչներին չենք տա, և որ մենք նրանցից չենք վախենում։ Մենք ուզում ենք, որ կյանքն առաջվանը լինի, նորից դպրոց գնանք։ Բացի այդ, ուզում ենք կուշտ փորով հաց ուտել», – Sputnik Արմենիայի հետ զրույցում ասաց 12-ամյա Ֆուադը։
Անմարդկային պայմաններում ողջ մնալ նրանց օգնեց խիզախությունը, կարծում է 8-ամյա Սախան։ Նա հիշում է, թե ինչպես էր ընկերների հետ աննկուն պաշտպանում քաղաքը մինչև վերջ։
«Բանակը խոստացավ պաշտպանել մեզ և կատարեց խոստումը։ Իսկ մենք խոստացել էինք, որ չենք վախենալու, լավ ենք սովորելու»,– ասաց Սախան։
Աբդալան հոր հետ ապրում է տատիկի տանը, որը փորձում է փոխարինել մորը։ Նա երազում է ինժեներ դառնալ, վերականգնել քանդված շենքերը։
«Շատ եմ կարոտում մայրիկին և եղբորս` Ահմեդին։ ԻԼԻՊ–ը հրթիռակոծեց մեր տունը։ Շենքը փլուզվեց, մայրիկս ու եղբայրս մահացան»,– ասում է Աբդալան` արցունքները խեղդելով կոկորդում։
Նա տեսել է, թե երեխաներն ինչպես են մահանում ռմբակոծություններից ու սովից։ Պաշարումից փրկված երեխաները խոստովանում են, որ արդեն երեք տարի է, ինչ քաղցրավենիք չեն կերել։ Շրջափակումը ճեղքելուց հետո կյանքը բարելավվեց. այսօր նրանք կարող են սովորել, խաղալ և ավելի լավ սնվել, թեև նրանց համար հարազատների կորուստը ոչնչով չի փոխարինվի։
Սեպտեմբերի 10-ին Դեր Զորում սիրիական բանակի մարտիկները ճեղքեցին «ԻՊ» ահաբեկչական խմբավորման հարավային դիրքերը։ Առաջին անգամ սեպտեմբերի 5-ին «Անապատի մարգարիտ» կոչվող սիրիական այս քաղաքը շրջափակումից դուրս բերեցին Սիրիական բանակի «Վագրեր» էլիտար ստորաբաժանումների մարտիկները։
