ԵՐԵՎԱՆ, 11 սեպտեմբերի — Sputnik. «Լապշինին ներում շնորհելով՝ Ալիևը փորձում է ինչ-որ ժեստ անել, փորձել բարելավել իր կորուստներն արտաքին հարաբերություններում, միջազգային ատյաններում, փակել իր սկանդալային պատմություններն ու ասել. նայեք՝ ինչ «պուպուշիկ» եմ, նույնիսկ ներել գիտեմ»,- ասում է ԱԺ նախկին պատգամավոր, քաղաքագետ Թևան Պողոսյանը:
Բացի դա, Ալիևն այդ կերպ փորձում է հարթել նաև Իսրայելի հետ կապված խնդիրները: Ըստ բանախոսի՝ այդ երկրի հետ կա երկու խնդիր: Առաջինն այն անօդաչու սարքերի հետ կապված պայմանագրերի դադարեցումն է, որը, Թևան Պողոսյանի կարծիքով, եղել է հատուկ մշակված ծրագիր, որպեսզի կարողանան կազմակերպել իրենց քաղաքացու արտահանձնումը:
Հաջորդը՝ հաշվի առնելով նաև այն հանգամանքը, որ այսօր խոսվում է Ադրբեջանի պաշտպանության նախարարի՝ Իսրայել կատարվելիք այցի մասին, ապա դա կարող է լինել նաև «նվեր մատուցելու ժեստ»:
«Լապշինն այլևս ինձ պետք չէ, միայն վնասներ է բերում. ձեր քաղաքացուն ձեզ նվեր եմ տալիս սկզբունքով»,- ասում է Պողոսյանը:
Հիշեցնենք, որ 2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան «սև ցուցակի» մեջ էր ընդգրկել առանց Բաքվի համաձայնության Արցախի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու եւ Լապշինին հանձնելու մասին: Բաքվի դատարանը Լապշինին դատապարտել է 3 տարվա ազատազրկման:
