ԵՐԵՎԱՆ, 11 սեպտեմբերի – Sputnik. Սամվել Բաբայանի գործից անջատված մասով մեղադրյալ Հրաչյա Մայիլյանն այսօր դատարան էր բերվել` ցուցմունք տալու։ Նա այն մարդն է, ով, ըստ նախաքննության վարկածի, «Իգլան» հանձնել է ԱԱԾ-ին: Հրաչյա Մայիլյանը դատարանում օգտվեց իր լռելու իրավունքից և հրաժարվեց ցուցմունք տալ: Փոխարենը դատարանում ընթերցվեց նրա նախաքննական ցուցմունքը:
Դրանում Մայիլյանը պատմել էր, որ իր ընկերը՝ գործով ամբաստանյալ Արմեն Պողոսյանը, որն Էջմիածնում հայտնի է «Ժորիկ» անունով, իրեն խնդրել էր հետաքրքրվել Վրաստանից «Իգլա» տեսակի զենք գնելու հարցով։ Նրա խոսքով` վերջինը ասել էր, որ այն տանելու է Արցախ, բանակին հանձնի, որ պաշտոն ստանա։
Մայիլյանը «Իգլայի» հարցով դիմել է վրացիներին, բայց չի գտել։ Ապա մեկնել է Ուկրաինա, բայց ձեռնունայն վերադարձել Հայաստան: 2017–ի սկզբին Ժորիկն իրեն ծանոթացրել է Էջմիածնի նախկին քաղաքապետի որդու` Ռոբերտ Աղվանյանի հետ, ով ասել է, որ իր ուզած զենքը կա, բայց որոշ մասեր բացակայում են:
Ավելի ուշ, հենց այդ պատճառաբանությամբ, Արմեն Պողոսյանը հրաժարվել է զենքը գնելուց և այն մնացել է Մայիլյանի ավտոտնակում: Իսկ երբ, մարտի 21-ին ԱԱԾ աշխատակիցները խուզարկել են Մայիլյանի տունը և, ոչինչ չհայտնաբերելուց հետո, նրան հրավիրել ԱԱԾ, ինքը հայտնել «Իգլայի» մասին և այն հանձնել իրավապահներին:
Մայիլյանի ցուցմունքի հրապարակումից հետո Սամվել Բաբայանը դատարանում հիշեցրեց, որ նրա նկատմամբ 2014թ.–ին քրեական գործ է հարուցված եղել, որը հետո կասեցվել է, բայց 2017թ–ին վերաբացվել է։ «Տարել են կոխել պադվալը, ասել են` ոնց ասում ենք, գրի»,- ասաց Բաբայանը:
Այսպիսով, դատական նիստն ավարտվեց։ Հաջորդ նիստը նշանակվեց սեպտեմբերի 23-ին:
