ԵՐԵՎԱՆ, 11 սեպտեմբերի — Sputnik. Ռուսաստանի նախագահ Վլադիմիր Պուտինը շքանշանով պարգևատրել է Հայաստանում Ռուսաստանի դեսպան Իվան Վոլինկինին, գրված է իրավական տեղեկատվության պաշտոնական պորտալում տեղադրված նախագահի հրամանում։
«Ռուսաստանի Դաշնության արտաքին քաղաքականության իրականացման գործում ներդրած մեծ ավանդի համար Պատվո շքանշանով պարգևատրել Լեհաստանում Ռուսաստանի արտակարգ և լիազոր դեսպան Սերգեյ Վադիմի Անդրեևին, Սիրիայում արտակարգ և լիազոր դեսպան Ալեքսանդր Ալեքսանդրի Կինշչակին, Հայաստանում արտակարգ և լիազոր դեսպան Իվան Կիրիլի Վոլինկինին, Հունաստանում արտակարգ և լիազոր դեսպան Անդրեյ Միխայլովի Մասլովին»,- նշվում է փաստաթղթում:
Իվան Վոլինկինը Հայաստանում արտակարգ և լիազոր դեսպան էր նշանակվել 2013 թվականի մարտի 21-ին՝ նախագահի N 262 հրամանով։
Նա առաջին դասի արտակարգ և լիազոր դեսպանորդի դիվանագիտական աստիճան ունի։
Դիվանագիտական գործունեությամբ զբաղվում է սկսած 1981 թվականից։ Աշխատել է Հարավսլավիայում Ռուսաստանի/ԽՍՀՄ դեսպանատանը (1981-1987, 1991-1996 թթ), Սան–Ֆրանցիսկոյի Ռուսաստանի գլխավոր հյուպատոսությունում (1999-2002 թթ), Սերբիայում և Չերնոգորիայում ԵԱՀԿ առաքելությունում (2003 թ)։ 2005-2008 թվականներին` Վրաստանում Ռուսաստանի դեսպանատան խորհրդական–դեսպանորդ։ 2008 թվականի նոյեմբեր–օգոստոսին` Մակեդոնիայում Ռուսաստանի դեսպանատան խորհրդական–դեսպանորդ, 2008 թվականի դեկտեմբերից՝ նախարարի խորհրդական, Ռուսաստանի ԱԳՆ գլխավոր քարտուղարի դեպարտամենտի փոխտնօրեն։
