ԵՐԵՎԱՆ, 11 սեպտեմբերի – Sputnik. Գեղարքունիքի մարզի ընդհանուր իրավասության դատարանի նախագահը, նույն դատարանի դատավորը, մարզի դատախազության դատախազն առաջիկայում կկանգնեն դատարանի առաջ։
Կաշառքի փաստով հարուցված քրեական գործի նախաքննության ընթացքում պարզվել է, որ Վարդենիս քաղաքում զենքի գործադրմամբ կատարված խուլիգանության և դանակահարության փաստով մեղադրյալ Գոռ Գալստյանի արարքը որպես ինքնապաշտպանություն որակելու համար Գեղարքունիքի մարզի դատախազ Սևակ Շհոյանը մեղադրյալի ծնողներից պահանջել է 4000 ԱՄՆ դոլար կաշառք:
Բայց գումարը ստանալուց հետո դատախազը խոստումը չի կատարել։ Գոռ Գալստյանը կալանավորվել է: Իրենց որդուն ավելի մեղմ պատժի ենթարկելու և նույն գործով մեղադրվող իրենց բարեկամին պատասխանատվությունից ազատելու համար Գոռ Գալստյանի ծնողները Վարդենիսի բնակիչ Հայկ Կարապետյանի և Գեղարքունիքի մարզի ընդհանուր իրավասության դատարանի նախագահի վարորդ Կարեն Մարտիկյանի միջոցով դատարանի նախագահ Աղվան Պետրոսյանին են փոխանցել 23.000 ԱՄՆ դոլար կաշառք։ Դրանից հետո դատարանը կայացրել է նախապես պայմանավորված ապօրինի դատական ակտը:
Բայց սա դեռ ամենը չէ։ Քրեական գործի նախաքննության ընթացքում բացահայտվել է կաշառքի մեկ այլ դեպք ևս։ Գեղարքունիքի մարզի ընդհանուր իրավասության դատարանի նախագահն ու նույն դատարանի դատավոր Վանիկ Վարդանյանը կաշառք են պահանջել նաև Ձորագյուղ համայնքի բնակիչ Զարիկ Գրիգորյանից` անշարժ գույքի կապակցությամբ ցանկալի վճիռ կայացնելու համար։ Այս անգամ 120.000 ՌԴ ռուբլի կաշառքը տեղ է հասել փաստաբան էդվարդ Չինարյանի միջնորդությամբ։
Իսկ ապօրինի դատական վճռի հիմնավորման համար դատարանի նախագահն ու դատավորն անհրաժեշտ կեղծ փաստաթղթեր են պահանջել ՀՀ անշարժ գույքի կադաստրի պետական կոմիտեի 3 աշխատակիցներից։
Ի դեպ, դատավորի վարորդը պարզվում է Գեղարքունիքի մարզի համապատասխան մարմիններում նաև այլ գործեր է արել։ Նախաքննության ընթացքում բացահայտվել է, որ «Նուբարաշեն» ՔԿՀ-ի կալանավոր, ծանր և առանձնապես ծանր հանցագործությունների մեջ մեղադրվող Լիպարիտ Մարգարյանին իր նախընտրած խուց տեղափոխելու համար Գեղարքունիքի մարզի ընդհանուր իրավասության դատարանի նախագահի վարորդ Կարեն Մարտիկյանն ու նրա ընկերը` նույն մարզի բնակիչ Հայկ Կարապետյանը 45.000 ՀՀ դրամ կաշառք են տվել ՔԿՀ աշխատակից Լաուրա Մարտիրոսյանին:
Քրեական գործի նախաքննությունն ավարտվել է։ Կաշառքի համար մեղադրվող 13 անձինք առաջիկայում կհայտնվեն ամբաստանյալի աթոռին։
