ԵՐԵՎԱՆ, 9 սեպտեմբերի — Sputnik. Կիևի կենտրոնում՝ Բեսարաբի հրապարակում պայթած ավտոմեքենայի հետևանքով տուժած կինը Dior ապրանքանիշը ներկայացնող հայտնի մոդել է եղել, այդ մասին «112 Ուկրաինա» պորտալին հայտնել է տուժածի ընկերուհին:
Կիևի կենտրոնում՝ Բեսարաբի հրապարակում, սեպտեմբերի 8-ին ավտոմեքենա է պայթել: Վարորդը տեղում մահացել է: Նա ազգությամբ չեչեն Վրաստանի քաղաքացի Տիմուր Մախաուրին է եղել, որն, ՈՒկրաինայի ՆԳՆ հաղորդակցման դեպարտամենտի տնօրեն Արտյոմ Շևչենկոյի խոսքով` հայտնի է եղել քրեական շրջաններում և Դոնբասի մարտական գործողությունների մասնակից է եղել:
Մեքենայում եղել է նաև կին և երեխա։ Նրանց դուրս են բերել ավտոմեքենայից և տեղափոխել հիվանդանոց: Կնոջ վիճակը գնահատվում է ծանր, նա այրվածքներ և վերջույթների լուրջ վնասվածք ունի:
«Նրա անունը Նատալյա է: Հայտնի մոդել է: Ներկայացրել է Dior ապրանքանիշը։», — ասել է կնոջ ընկերուհին` չնշելով տուժածի ազգանունը:
Երեխայի կյանքին վտանգ չի սպառնում:
