ԵՐԵՎԱՆ, 8 սեպտեմբերի — Sputnik. Ժամանակակից նորաձևությունը տարաձայնություն է առաջացրել Թուրքիայում, որտեղ բնակիչների մի մասը պահպանողական հայացքներ ունի, մյուս մասը` լիբերալ։ Անկարայի տներից մեկի բնակիչները բողոքել են շենքի լիազորին, որ իրենց հարևանուհին «շորտ» է հագնում։
Բնակիչները պահանջել են, որ իրենց հարևանուհին փակ պահի վարագույրները։ Այս մասին հայտնում է թուրքական Нurriyet թերթը։
Սա առաջին դեպքը չէ Թուրքիայում, երբ բնակչության պահպանողական հատվածը բողոքում է լիբերալ հայացքներ ունեցողներից։ Անցած տարվա սեպտեմբերին հասարակական տրանսպորտում ուղևորներից մեկը կնոջն ապտակել էր «շորտի» համար։ Ու թեև նա հետո պատժվել էր, այնուհանդերձ պետք է ասել, որ Թուրքիայում կարճ հագուստի դեմ բողոքի ալիքը ժամանակ առ ժամանակ ավելի է մեծանում։
«Չի կարելի միանշանակ ասել, որ Թուրքիայում կարճ զգեստ հագնել չի կարելի։ Ստամբուլն ավելի լիբերալ է, Անկարան` կոնսերվատիվ։ Քույրս Ստամբուլում է ապրում, ու նա և՛շորտ է հագնում, և՛ կարճ զգեստ», — Sputnik Արմենիայի թղթակցի հետ զրույցում ասաց Թուրքիայի բնակիչ Նորայր Կեստեկյանը։
Նրա խոսքով` առաջադեմ հայացքներ ունեցող հասարակության դեմ մղվող «պատերազմը» երբեք չի ավարտվի։
Այս տարվա հուլիսին Թուրքիայում բողոքի ակցիաների և ցույցերի ալիք էր բարձրացել։ Ակցիայի մասնակիցները գեղեցիկ սեռի ներկայացուցիչներն էին, որոնք պնդում էին` «թող ինձ իմ հանդերձանքով»։ Նրանք բողոքում էին ավանդական հագուստի դեմ և նշում, որ այլևս չեն վախենում հագնել այն, ինչ իրենք են ցանկանում։
