ԵՐԵՎԱՆ, 8 սեպտեմբերի — Sputnik. Արթուր Օհանյանը որոշել է Գրաֆ անունով գերմանական հովվաշան հետ շուրջերկրյա ճանապարհորդություն իրականացնել հեծանվով։
Այս տարվա հունվարից ի վեր նա արդեն անցել է Իրանով, Թուրքմենստանով, Ղազախստանով և հասել է Բիշքեկ։
«Ճամփորդությունների ժամանակ հեծանիվիս եռագույնն է ամրացված։ Տարբեր երկրներում, քաղաքներում, գյուղերում հայերն ինձ արցունքներով էին դիմավորում։ Նրանք տեսնում են դրոշը, ինձ, ուրախանում են հայրենակցի հետ հանդիպումից։ Սա է իմ շուրջերկրյա ճանապարհորդության ամբողջ իմաստը», — ասում է Օհանյանը։
Նրա խոսքով` յուրաքանչյուր երկրում նրան գրկաբաց են դիմավորում, նույնիսկ եթե նա լեզվին չի տիրապետում։
«Ես պարսկերեն չգիտեմ, բայց իրանցիների հետ մի կերպ հասկանում էինք միմյանց։ Ասեմ, որ ինձ ամեն տեղ էլ ջերմ են ընդունում։ Իսկ իմ գերմանական հովվաշունը չի հոգնում ճանապարհին, ինչը շատերին է զարմացնում», — նշում է Sputnik Արմենիայի զրուցակիցը։
Հիմա Արթուրը Բիշքեկում է, Չինաստան գնալու համար վիզայի է սպասում։ Այնտեղից նա Յակուտիա է ուղևորվելու, Յակուտիայից էլ` Լատվիա, Լիտվա ու Կալինինգրադ։
Շուրջերկրյա ճանապարհորդություն ձեռնարկած հեծանվորդը պետք է ունենա կայուն հոգեբանություն ու մարդկանց հետ շփվելու ունակություն։ Բոլոր այլ հարցերը, հատկապես` ֆինանսական, երկրորդ պլան են մղվում։
«Պետք է կարողանաս մարդկանց հետ շփվել, ընդհանուր լեզու գտնել. նրանք ամենուրեք շատ տարբեր են», — ասում է Օհանյանը։
Հեծանվորդն ու նրա Գրաֆը շուրջերկրյա ճանապարհորդության են դուրս եկել 2017 թվականի հունվարին։
