ԵՐԵՎԱՆ, 8 սեպտեմբերի — Sputnik, Արմենուհի Մխոյան. Հայաստանի ամենամեծ ազգային փոքրամասնությունն հանդիսացող եզդի համայնքը կտրականապես դեմ է դպրոցների 12-ամյա կրթությանը՝ ազգային սովորույթներն ու ավանդույթները հաշվի չեն առնվել: 9-ամյա կրթության ժամանակ ամեն ինչ նորմալ էր, իսկ հիմա աղջիկները «տանն են մնում»: Սրանով եզդի աղջիկների բախտին «քար է գցվում»: Ազատան համայնքի ղեկավար Վարդան Իկիլիկյանը հարցն այնքան է կարևորում, որ խնդիրը մարզային խորհրդի նիստին բարձրացրեց:
«Ես ի՞նչ անեմ` նույնիսկ մինչև 12-րդ դասարան չեն գալիս, ու ոչ միայն աղջիկները, այլ նաև տղաները: Չեն գալիս ու վերջ. նրանց ամուսնանալու ժամանակն է: Նույնիսկ իրենց համայնքի առաջնորդին եմ գրել՝ օգուտ չկա: Ի՞նչ անեմ՝ կին, ամուսին ու երեխայով ստիպեմ դպրոց գալ: Նրանք կտրականապես հրաժարվում են»,- ասում է Իկիլիկյանը։
Միաժամանակ նա նշում է, որ այդ երեխաներից շատերը լիրաժեք կրթություն ստանալու դեպքում լավ արդյունքների կհասնեն:
Նշենք, որ այս պահին միայն Ազատանում 5 դպրոցահասակ եզդի երեխա դպրոց չի հաճախում:
ՀՀ-ում 12-ամյա կրթությունը պարտադիր է: «Հանրակրթության մասին» օրենսդրական պահանջն ուժի մեջ է մտել 2017 թվականի սեպտեմբերի 1-ից։
