ԵՐԵՎԱՆ, 7 սեպտեմբերի — Sputnik. Ավան և Նոր Նորք վարչական շրջանների ընդհանուր իրավասության առաջին ատյանի դատարանում այսօր` սեպտեմբերի 7-ին, շարունակվեց «Սասնա ծռերի» գործով դատական նիստն առանց ամբաստանյալների։ Դատավոր Արտուշ Գաբրիելյանը հայտնեց, որ նրանց նկատմամբ կիրառվել է դատական սանկցիա և հեռացվել են դատական նիստերի դահլիճից:
Նիստից բացակայում էին նաև պաշտպաններից մի քանիսը։ Նիստերի դահլիճում ներկա պաշտպանները հայտնեցին, որ նրանք դատարանի շենքում են և չեն կարող ներկայանալ նիստին, որովհետև հրաժարվում են կատարել դատական կարգադրիչների անօրինական պահանջները:
Դատավորն ասաց, որ նրանք կարող են ներկայանալ նիստին կարգադրիչների պահանջը կատարելուց հետո:
Դատավորի ու պաշտպանների միջև բանավեճ ծավալվեց, ինչից հետո պաշտպաններ Արայիկ Պապիկյանը, Լուսինե Սահակյանն ու Հրանտ Գևորգյանը լքեցին նիստերի դահլիճը:
Դատարանը գնաց խորհրդակցական սենյակ և սանկցիա կիրառեց նրանց նկատմամբ՝ պատասխանատվության ենթարկելու դիմումով դիմելով Փաստաբանների պալատ:
Այսօրվա դատական նիստում պետք է քննվեր «Սասնա ծռերից» 18-ի՝ Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Արթուր Մելքոնյանի, Տիգրան Սարգսյանի, Տիգրան Մանուկյանի, Արայիկ Հակոբյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի,Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորգ Իրիցյանի, Թորոս Թորոսյանի, Մանվել Աթոյանի, Վարդգես Գևորգյանի քրեական գործը։
