ԵՐԵՎԱՆ, 7 սեպտեմբերի — Sputnik. Պապիլոմա վիրուսի դեմ պատվաստանյութը Հայաստանում ներդրվելու է 2017 թվականի դեկտեմբերից։ Այն ունենալու է պարտադիր բնույթ, բայց չցանկացողներն էլ կարող են գրավոր համաձայնությամբ հրաժարվել պատվաստումից։ Առողջապահության նախարար Լևոն Ալթունյանը կառավարության հերթական նիստից հետո հայտնեց իրենց դիրքորոշումը` չվարանել ու պատվաստվել։
«Ցավալիորեն մեզ մոտ ուռուցքները հայտնաբերվում են 3-4-րդ փուլում, բուժման համար ծախսվում են մեծ միջոցներ, իսկ հիվանդը դրանից հետո ապրում է 2-3, մաքսիմում 5 տարի։ Պատվաստվելու դեպքում մենք կունենանք հիվանդություններից խուսափելու հնարավորություն շատ ավելի լավ էֆեկտով»,- ասաց նախարարը։
Տեղեկացնենք, որ պապիլոմա վիրուսի դեմ պատվաստանյութը ներդրվել է աշխարհի 70 երկրում։ Լրագրողների այն դիտարկմանը, որ մեր երկրում հանրությունը մտավախություններ ունի այս հարցում, նախարար Ալթունյանն ասաց` հավաքեք բոլոր մտավախությունները և ուղարկեք մեզ։
«Ձեզ խոսք եմ տալիս` բոլոր երկրների առողջապահության նախարարություններին կդիմենք և իրենց մասնագիտացած կարծիքը ձեզ կտրամադրենք։ Այսօր պապիլոմա վիրուսի դեմ պատվաստանյութը ոսկե ստանդարտ է` առաջակված առողջապահության համաշխարհային կազմակերպության կողմից»,- ասաց Ալթունյանը։
Նախարարն ավելացրեց, որ մինչև առաջարկելը մասնագետները ուսումնասիրել են հարցն ու պատվաստման եզրահանգման եկել։ Առողջապահության նախարարությունը հորդորում է անցնել այդ պատվաստումները։
