ԵՐԵՎԱՆ, 7 սեպտեմբերի — Sputnik. Ախուրյանի ջրամբարի մասով մամուլում տեղ գտած հրապարակումների հիման վրա, Շիրակի մարզի դատախազի հանձնարարականով, ՀՀ ոստիկանության Ախուրյանի բաժնում նյութեր կնախապատրաստվեն: Այս մասին Sputnik Արմենիային տեղեկացրեց Շիրակի մարզի դատախազ Կարեն Գաբրիելյանը:
«Իմ հանձնարարությամբ բոլոր հրապարակումներն ուղարկվել են բաժին՝ նյութեր նախապատրաստելու համար: Նյութերը նախապատրաստվում են բոլոր հանգամանքները պարզելու համար»,-նշեց Կարեն Գաբրիելյանը:
Ջրամբարից ոռոգման նպատակով ջրի մեծ ծավալի ջրթողի, ինչպես նաև աղտոտվածության հետևանքով թթվածնային քաղցի պատճառով ջրամբարում մեծ քանակությամբ ձկներ են սատկել: Ջրի մակարդակի շեշտակի իջեցումը ձկների մասսայական ոչնչացման պատճառ է դարձել:
Ջրամբարը, որը կառուցվել է 1963 թվականին ԽՍՀՄ և Թուրքիայի միջև կնքված համաձայնագրի հիման վրա, բացառապես ոռոգման նպատակով է կառուցված, իսկ ջրամբարում ձկնաբուծություն իրականացվել է ինքնագործունեության հիմունքներով, որի համար Ջրային տնտեսության պետական կոմիտեն երբևէ համապատասխան թույլտվություն կամ համաձայնություն չի տվել: Ավելին՝ Ջրային տնտեսության պետական կոմիտեն իրավասու չէ նման թույլտվություն տալ՝ առանց թուրքական կողմի համաձայնության:
Ջրամբարը տնօրինվում է հավասար պայմաններով՝ Հայաստանի ու Թուրքիայի կողմից՝ 50-50 տարբերակով:
