ԵՐԵՎԱՆ, 7 սեպտեմբերի — Sputnik. Հայաստանում գործող կարգավորումների համաձայն՝ արտադրանքի ապրանքների արտահանման ժամանակ ավելացված արժեքի հարկի (ԱԱՀ) վերադարձն իրականացվում է 90-օրյա ժամկետում։ ՀՀ վարչապետ Կարեն Կարապետյանը Պետեկամուտների կոմիտեին հանձնարարեց գործընթացն ավելի կարճ ժամկետում իրականացնել։
«2-օրյա ժամկետում ուսումնասիրել ու կառավարության աշխատակազմ ներկայացնել առաջարկություն` խաղողի վերամշակմամբ զբաղվող ընկերությունների կողմից արտահանման դեպքում ավելացված արժեքի հարկի վերադարձն ավելի կարճ ժամկետում սահմանելու ու կազմակերպելու վերաբերյալ»,-ասաց վարչապետը։
Կարապետյանը հայտնեց, որ հսկողություն են սահմանել և կարգապահությունը խիստ պաշտպանվում է։
Նա տեղեկացրեց նաև, որ կառավարությունում կոնյակի և գինու արտադրությամբ զբաղվող ընկերությունների հետ հանդիպման ժամանակ բարձրացվել է արտահանման դեպքում ԱԱՀ վերադարձի ժամկետի ընդհանուր տևողության հարցը:
Վարչապետը գյուղատնտեսության նախարարին հանձնարարեց ՊԵԿ-ին ներկայացնել արտահանողների ցուցակը։ ՊԵԿ նախագահ Վարդան Հարությունյանն էլ պարտավոր է հատուկ ռեժիմ դնել մթերման հստակ ժամանակահատվածում:
