ԵՐԵՎԱՆ, 6 սեպտեմբերի — Sputnik. Եթե հակամարտող պետությունների պարագայում զենքի վաճառքի վրա լիներ էմբարգո, ապա խոսակցությունները, որ եթե ես զենք չվաճառեմ, այլ պետություն կվաճառի, չեն լինի, լրագրողների հետ զրույցում ասաց ՀՀ փոխարտգործնախարար Շավարշ Քոչարյանը` մեկնաբանելով Վլադիմիր Պուտինի այն հայտարարություն, որ ԱՄՆ-ի` Ուկրաինային զենք մատակարարելը սրում է իրավիճակը։
Նա այս համատեքստում անդրադարձավ նաև Ադրբեջանին զենք մատակարարելու թեմային` նշելով, որ այս կապակցությամբ ինքն առաջարկ է արել։
«Իմ առաջարկն էր` քանի որ ԵԱՀԿ Մինսկի խմբի երեք համանախագահները ՄԱԿ-ի անվտանգության խորհրդի մշտական անդամ են, ունեն բավարար ներուժ, հնարավորություն, փորձեն հասնել նրան, որ լինի նման գոտիներում, մասնավորապես մեզ մոտ, զենքի մատակարարման էմբարգո: Դա կլիներ հարցի լուծում, որևէ պետություն չէր կարողանա ասել, որ եթե ես չվաճառեմ, ուրիշից կգնեն»,- նշեց փոխնախարարը։
ՌԴ նախագահ Վլադիմիր Պուտինն ավելի վաղ ԲՐԻԿՍ գագաթնաժողովից հետո հայտարարել է, որ հակամարտող երկրներին զենք վաճառելը չի օգնի նրանց հաշտեցմանը, այլ ավելի կխորացնի իրավիճակը։
